ദിബ്രുഗഢ്: വടക്കുകിഴക്കന് മണ്ണില് വീണ്ടും ഒരു ഫുട്ബോള് വസന്തത്തിന് കാഹളം മുഴങ്ങുന്നു. എട്ടാം വട്ടം സന്തോഷ് ട്രോഫിയില് മുത്തമിടുക എന്ന ലക്ഷ്യവുമായി കേരളത്തിന്റെ ചുണക്കുട്ടികള് ഇന്ന് ഫൈനലില് ബൂട്ടു കെട്ടും. കരുത്തരായ സര്വീസസാണ് കലാശപ്പോരാട്ടത്തില് കേരളത്തിന്റെ എതിരാളികള്. ധാക്കുവാഖാന സ്റ്റേഡിയത്തില് ഉച്ചയ്ക്ക് ഒരു മണിക്കാണ് വാശിയേറിയ പോരാട്ടം നടക്കുക.
ക്വാര്ട്ടറിലും സെമിയിലും എതിരാളികളെ ഗോള്മഴയില് നനയിച്ച ആത്മവിശ്വാസത്തിലാണ് കേരളം ഇറങ്ങുന്നത്. ക്വാര്ട്ടര് ഫൈനലില് അസമിനെ 3-0 ന് പരാജയപ്പെടുത്തി. സെമി ഫൈനലില് പഞ്ചാബിനെ 4-0 ന് തകര്ത്തു. ടൂര്ണമെന്റിലുടനീളം 16 ഗോളുകള് അടിച്ചുകൂട്ടിയ കേരളം വഴങ്ങിയത് വെറും മൂന്ന് ഗോളുകള് മാത്രമാണ്.
ആക്രമണ ഫുട്ബോളിലൂടെ കാണികളെ ആവേശത്തിലാക്കാനാണ് തങ്ങള് ശ്രമിക്കുന്നതെന്ന് കോച്ച് ഷഫീഖ് ഹസ്സന് വ്യക്തമാക്കി. ടീം ഇപ്പോള് പൂര്ണ്ണ സജ്ജമാണെന്ന് പ്രതിരോധ താരം എം. മനോജും കൂട്ടിച്ചേര്ത്തു.
ഗ്രൂപ്പ് ഘട്ടത്തില് കേരളത്തെ തോല്പ്പിച്ച ഏക ടീമാണ് സര്വീസസ്. പ്രതിരോധത്തിന് ഊന്നല് നല്കി പ്രത്യാക്രമണത്തിലൂടെ ഗോള് നേടുന്നതാണ് പട്ടാളസംഘത്തിന്റെ ശൈലി. മുന്നേറ്റനിരയിലെ അഭിഷേക് പവാറാണ് കേരളത്തിന് ഏറ്റവും വലിയ ഭീഷണി. യോഗ്യതാ റൗണ്ട് പിന്നിട്ടാല് കിരീടവുമായി മാത്രമേ മടങ്ങൂ എന്ന ഉറച്ച തീരുമാനത്തിലാണ് തങ്ങളെന്ന് സര്വീസസ് കോച്ച് എം.ജി. രാമചന്ദ്രന് പറഞ്ഞു.
ഗ്രൂപ്പ് ഘട്ടത്തിലെ തോല്വി കേരളത്തിന് വലിയ ആശങ്കയുണ്ടാക്കുന്നില്ല. അന്ന് പരീക്ഷിച്ച തന്ത്രങ്ങള് പാളിയതാണെന്നും ഫൈനലില് തികച്ചും വ്യത്യസ്തമായ കേരളത്തെയാകും സര്വീസസ് നേരിടേണ്ടി വരികയെന്നും ടീം മാനേജ്മെന്റ് കരുതുന്നു. മധ്യനിരയിലെ ആധിപത്യം മത്സരഫലത്തില് നിര്ണ്ണായകമാകും.
Related News
