തായിഫ്: സൗദി അറേബ്യയിലെ തായിഫ് നഗരത്തില്‍ റമദാന്‍ മാസത്തെ വരവേല്‍ക്കാനുള്ള ഒരുക്കങ്ങള്‍ പൂര്‍ത്തിയാകുന്നു. മതപരമായ മൂല്യങ്ങളും ആഴത്തില്‍ വേരൂന്നിയ സാമൂഹിക ആചാരങ്ങളും ഒത്തുചേരുന്ന തായിഫിലെ റമദാന്‍ അന്തരീക്ഷം ഏറെ സവിശേഷമാണ്.

റമദാന്‍ മാസത്തിന് മുന്നോടിയായി തന്നെ തായിഫിലെ വീടുകളും പരിസരങ്ങളും അലങ്കരിക്കുന്നതില്‍ സ്വദേശികള്‍ അതീവ താല്പര്യമാണ് കാണിക്കുന്നത്. പരമ്പരാഗത രീതിയിലുള്ള വിളക്കുകളും (ഫാനൂസ്), ചന്ദ്രക്കലയുടെയും നക്ഷത്രങ്ങളുടെയും രൂപത്തിലുള്ള വൈദ്യുത ദീപങ്ങളും കൊണ്ട് തെരുവുകളും മാര്‍ക്കറ്റുകളും പ്രകാശഭരിതമാണ്. ഈ ദൃശ്യഭംഗി നഗരത്തിന് ഒരു പ്രത്യേക സാംസ്‌കാരിക വ്യക്തിത്വം തന്നെ നല്‍കുന്നു.

പുണ്യമാസം എത്തുന്നതിന് മുന്‍പേ തന്നെ വീട്ടുസാധനങ്ങളും ഭക്ഷണപദാര്‍ത്ഥങ്ങളും ശേഖരിക്കുന്ന തിരക്കിലായിരുന്നു നഗരവാസികള്‍. റമദാനിലെ ഇഫ്താര്‍ വിരുന്നുകളും കുടുംബ സംഗമങ്ങളും വഴി ബന്ധങ്ങള്‍ ശക്തിപ്പെടുത്തുക എന്നതാണ് ഇതിന്റെ പ്രധാന ലക്ഷ്യം.
കുടുംബാംഗങ്ങള്‍ ഒന്നിച്ചിരുന്നുള്ള നോമ്പുതുറകളും അയല്‍വാസികള്‍ തമ്മിലുള്ള സ്‌നേഹപ്രകടനങ്ങളും തായിഫിലെ റമദാന്‍ കാഴ്ചകളെ മനോഹരമാക്കുന്നു. സന്തോഷത്തിന്റെയും ആത്മീയതയുടെയും സന്ദേശം പകരുന്ന ഇത്തരം അലങ്കാരങ്ങളും തയ്യാറെടുപ്പുകളും സമൂഹത്തില്‍ വലിയ ചലനമാണ് ഉണ്ടാക്കുന്നത്.

വിശ്വാസവും പാരമ്പര്യവും ഒരുപോലെ ചാലിച്ചു ചേര്‍ത്ത തായിഫിലെ ഈ റമദാന്‍ അന്തരീക്ഷം ഓരോ പ്രവാസിക്കും സ്വദേശിക്കും നവ്യാനുഭവമാണ് സമ്മാനിക്കുന്നത്.