റിയാദ്: പ്രവാസലോകത്തെ ജീവകാരുണ്യ പ്രവര്ത്തനങ്ങളില് മാതൃക തീര്ത്ത് ഇന്ത്യന് കള്ചറല് ഫൗണ്ടേഷന് (ഐ.സി.എഫ്) റിയാദ് റീജിയണ് നിര്മ്മിച്ചു നല്കിയ പതിമൂന്നാമത് 'ദാറുല് ഖൈര്' സമര്പ്പിച്ചു. മലപ്പുറം ജില്ലയിലെ വേങ്ങര കുഴിച്ചെന സ്വദേശിയായ പ്രവാസിക്കാണ് ഐ .സി.എഫ് റിയാദ് റീജിയണ് ഈ ഭവനം പണികഴിപ്പിച്ചു നല്കിയത്.
നിര്ധനരായ കുടുംബങ്ങള്ക്ക് സുരക്ഷിതമായ ഒരു വീട് ഒരുക്കുക എന്ന ലക്ഷ്യത്തോടെ ഐ.സി.എഫ് നടപ്പിലാക്കി വരുന്ന പദ്ധതിയാണ് ദാറുല് ഖൈര്. റിയാദ് റീജിയണിലെ പ്രവര്ത്തകരുടെയും പ്രവാസി മലയാളികളുടെയും അകമഴിഞ്ഞ സഹകരണത്തോടെയാണ് പദ്ധതിയുടെ ഭാഗമായുള്ള ഈ പതിമൂന്നാമത് ഭവനവും പൂര്ത്തീകരിച്ചത്. വീടിന്റെ താക്കോല് ദാനം ഐ.സി.എഫ് റിയാദ് സോഷ്യല്സര്വീസ് ഡയറക്ടറേറ്റ് (എസ്.എസ്.ഡി ) ഡെപ്യൂട്ടി പ്രസിഡന്റ് ബഷീര് മിസ്ബാഹി നിര്വ്വഹിച്ചു.
മുസ്ലിം ജമാഅത്ത് വേങ്ങര കൂരിയാട് സര്ക്കിള് പ്രസിഡന്റ് ഷാഫി മുസ്ലിയാര് ബഷീര് മിസ്ബാഹിയില് നിന്നും വീടിന്റെ താക്കോല് ഏറ്റുവാങ്ങി. പ്രവാസി സമൂഹത്തിന്റെ വിയര്പ്പും കരുണയും കൂടിച്ചേരുമ്പോള് സമൂഹത്തിലെ ദുര്ബല വിഭാഗങ്ങള്ക്ക് ലഭിക്കുന്ന വലിയ ആശ്വാസമാണ് ഇത്തരം പദ്ധതികളെന്ന് ചടങ്ങില് സംസാരിച്ചവര് അഭിപ്രായപ്പെട്ടു.
പരിപാടിയില് മുസ്ലിം ജമാഅത്ത് കുഴിച്ചെന യൂണിറ്റ് സെക്രട്ടറി മൂസക്കുട്ടി, മുന് ഭാരവാഹി സയ്യിദ് ബാപ്പു തങ്ങള് കുറ്റൂര് തുടങ്ങിയവര് സന്നിഹിതരായിരുന്നു. നിര്ധനരായ കുടുംബങ്ങള്ക്ക് ദാറുല് ഖൈര്, ഇന്ത്യയിലെ വിവിധ സംസ്ഥാനങ്ങളില് നല്കി വരുന്ന ശുദ്ധ ജല പദ്ധതികള്, രോഗികളായ
വിശ്രമ ജീവിതം നയിക്കുന്ന മുന് പ്രവാസികള്ക്ക് ചികിത്സാ സഹായം. പാവപ്പെട്ട പ്രവാസികള്ക്ക് നാട്ടിലേക്കുള്ള ടിക്കറ്റ് തുടങ്ങിയവ ഐ സി എഫിന്റെ സാമൂഹിക പ്രതിബദ്ധതയുടെയും പ്രവാസികള്ക്കും മറ്റു അശരണര്ക്കുമുള്ള കരുതലിന്റെ നേര്കാഴ്ചകളാണെന്ന് ഐ.സി. എഫ് റിയാദ് റീജിയണ് ഭാരവാഹികള് അറിയിച്ചു.
Related News
