റിയാദ്: 'നിയമലംഘകരില്ലാത്ത രാജ്യം' എന്ന ലക്ഷ്യത്തിലേക്കുള്ള യാത്രയില് പരിശോധനകള് കൂടുതല് കര്ശനമാക്കുകയാണ് സൗദി അറേബ്യ. എന്ട്രി വിസയില് റിക്രൂട്ട് ചെയ്യപ്പെട്ടവര് കാലാവധി കഴിഞ്ഞിട്ടും യാത്ര ചെയ്തില്ലെങ്കിലോ, അവരുടെ വിവരങ്ങള് കൃത്യസമയത്ത് അധികൃതരെ അറിയിക്കുന്നതില് സ്പോണ്സര്മാര് വീഴ്ച വരുത്തിയാലോ ഇനി വിട്ടുവീഴ്ചയുണ്ടാകില്ല.
നിയമലംഘനം നടത്തുന്ന തൊഴിലുടമകളെ കാത്തിരിക്കുന്നത് കടുത്ത ശിക്ഷാ നടപടികളാണ്. 50,000 റിയാല് വരെ (ഏകദേശം 11 ലക്ഷത്തിലധികം ഇന്ത്യന് രൂപ) പിഴയൊടുക്കേണ്ടി വരും. കൂൂതെ ആറ് മാസം വരെ തടവും ലഭിക്കാം. നിയമലംഘനം നടത്തുന്നത് ഒരു വിദേശി തൊഴിലുടമയാണെങ്കില്, ശിക്ഷാ കാലാവധി പൂര്ത്തിയാക്കിയ ശേഷം അവരെ സൗദിയില് നിന്നും നാടുകടത്തുകയും ചെയ്യും.
താമസം, തൊഴില്, അതിര്ത്തി സുരക്ഷാ നിയമങ്ങള് ലംഘിക്കുന്നവരെ കണ്ടെത്താന് പൊതുജനങ്ങളുടെ സഹകരണവും അധികൃതര് അഭ്യര്ത്ഥിച്ചിട്ടുണ്ട്. നിയമലംഘനങ്ങളെക്കുറിച്ച് ഈ നമ്പറുകളില് വിവരമറിയിക്കാം: മക്ക, മദീന, റിയാദ്, കിഴക്കന് പ്രവിശ്യയില്നിന്ന് 911 നമ്പറിലും രാജ്യത്തിന്റെ മറ്റ് ഭാഗങ്ങളില് ഉള്ളവര് 999 നമ്പറിലുമാണ് വിവരം അറിയിക്കേണ്ടത്.
വിവരങ്ങള് നല്കുന്നവരുടെ പേരോ മറ്റ് വിവരങ്ങളോ പൂര്ണ്ണമായും രഹസ്യമായി സൂക്ഷിക്കും. വിവരം നല്കുന്നവര്ക്ക് മറ്റ് നിയമപരമായ ബാധ്യതകള് ഉണ്ടാകില്ലെന്നും അധികൃതര് ഉറപ്പുനല്കുന്നു.
Related News
