റിയാദ്: പ്രവാസി കൂട്ടായ്മയായ 'കോഴിക്കോടന്സ്' വിലങ്ങാട് പ്രകൃതി ദുരന്ത ബാധിതര്ക്ക് പ്രഖ്യാപിച്ച പുനരധിവാസ പദ്ധതിയുടെ ഭാഗമായി നിര്മിച്ച ആദ്യ ഭവനം വിലങ്ങാട് പുതുതായി നിര്മിച്ച വീട്ടുപരിസരത്ത് വെച്ച് ഇന്ന് നടക്കുന്ന ചടങ്ങില് ഷാഫി പറമ്പില് എം.പി.യുടെ സാന്നിധ്യത്തില് കോഴിക്കോടന്സ് പ്രതിനിധികള് കുടുംബത്തിന് താക്കോല് കൈമാറുമെന്ന് ഭാരവാഹികള് വാര്ത്താസമ്മേളനത്തില് അറിയിച്ചു.
ദുരന്തസമയത്ത് സര്ക്കാര്-സന്നദ്ധ സംഘടനകളുടെ ശ്രദ്ധ വേണ്ടത്ര ലഭിക്കാതിരുന്ന വിലങ്ങാട് മേഖലയ്ക്ക് മുന്ഗണന നല്കിയാണ് കോഴിക്കോടന്സ് ഈ പുനരധിവാസ പദ്ധതി നടപ്പാക്കിയത്. ദുരന്തഭൂമിയിലേക്ക് സ്വന്തം പ്രതിനിധികളെ നേരിട്ട് അയച്ച് കൃത്യമായ പഠനം നടത്തിയ ശേഷമാണ് സംഘടന പദ്ധതിക്ക് രൂപം നല്കിയതെന്നും ഭാരവാഹികള് വ്യക്തമാക്കി.
വയനാട്ടിലും വിലങ്ങാടുമായി നിരവധി സഹായ പ്രഖ്യാപനങ്ങള് പല ഭാഗത്തുനിന്നും ഉണ്ടായിരുന്നെങ്കിലും, ഏറ്റവും വേഗത്തില് ഒരു വീടിന്റെ നിര്മാണം പൂര്ത്തിയാക്കി കൈമാറാന് കഴിഞ്ഞത് റിയാദിലെ പ്രവാസി സമൂഹത്തിന് വലിയ അഭിമാനമാണെന്നും ഭാരവാഹികള് പറഞ്ഞു.
വാര്ത്താസമ്മേളനത്തില് കോഴിക്കോടന്സ് ചീഫ് ഓര്ഗനൈസര് കെ.സി. ഷാജു, പുനരധിവാസ കമ്മിറ്റി കണ്വീനര് റാഫി കൊയിലാണ്ടി, ഫൗണ്ടര് മെമ്പറും പദ്ധതി ഉപദേശക സമിതി അംഗവുമായ മുനീബ് പാഴൂര്, മുന് ചീഫ് ഓര്ഗനൈസര്മാരായ സഹീര് മുഹ്യുദ്ദീന്, കബീര് നല്ലളം എന്നിവര് പങ്കെടുത്തു.
Related News
