ഇടുക്കി: ജോലി ആവശ്യാര്ഥം മറ്റെന്നാള് വിദേശത്തേക്ക് പോകാനിരുന്ന യുവാവ് ബൈക്കില് സഞ്ചരിക്കവേ റോഡരികിലെ കുഴിയിലേക്ക് വീണ് മരിച്ചു. തൊടുപുഴ മുതലക്കോടം സ്വദേശി ജെയ്സ് ബെന്നിയാണ് (27) അപകടത്തില്പ്പെട്ടത്. മുതലക്കോടത്തിന് സമീപം യാത്ര ചെയ്യുന്നതിനിടെ ജെയ്സ് സഞ്ചരിച്ച ബൈക്ക് നിയന്ത്രണം വിട്ട് റോഡരികിലെ ആഴത്തിലുള്ള കുഴിയിലേക്ക് മറിയുകയായിരുന്നു. അപകടം നടന്ന ഉടന് തന്നെ നാട്ടുകാര് ചേര്ന്ന് ജെയ്സിനെ അടുത്തുള്ള ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
പൊതുമരാമത്ത് വകുപ്പിന്റെ കടുത്ത അനാസ്ഥയാണ് അപകടത്തിന് കാരണമായതെന്ന് നാട്ടുകാര് ആരോപിച്ചു. മാസങ്ങള്ക്ക് മുന്പ് കലുങ്ക് നിര്മാണത്തിനായാണ് റോഡരികില് വലിയ കുഴി എടുത്തത്. എന്നാല് നിര്മാണം പൂര്ത്തിയാക്കുകയോ കുഴി കൃത്യമായി മൂടുകയോ ചെയ്യാതെ അധികൃതര് ഇത് അപകടകരമായ രീതിയില് ഉപേക്ഷിച്ചിരിക്കുകയായിരുന്നു. കുഴി മൂടണമെന്ന് പലതവണ നാട്ടുകാര് ആവശ്യപ്പെട്ടിട്ടും ഉദ്യോഗസ്ഥര് നടപടിയെടുക്കാന് തയ്യാറായില്ലെന്ന് പ്രദേശവാസികള് പറയുന്നു.
വിദേശത്തേക്ക് പോകാന് തയ്യാറെടുത്തിരുന്ന യുവാവിന്റെ അപ്രതീക്ഷിത മരണം നാടിനെ കണ്ണീരിലാഴ്ത്തി. സംഭവത്തില് ഉദ്യോഗസ്ഥര്ക്കെതിരെ കര്ശന നടപടി വേണമെന്ന ആവശ്യവുമായി നാട്ടുകാര് രംഗത്തെത്തിയിട്ടുണ്ട്.
അതിനിടെ വീഴ്ച എവിടെയാണെന്ന് പരിശോധിക്കാന് പൊതുമരാമത്ത് വകുപ്പ് വിജിലന്സ് വിഭാഗത്തിന്റെ ഡെപ്യൂട്ടി ചീഫ് എന്ജിനീയറെ ചുമതലപ്പെടുത്തിയിട്ടുണ്ടെന്ന് മന്ത്രി പി.എ. മുഹമ്മദ് റിയാസ് അറിയിച്ചു. റിപ്പോര്ട്ട് ലഭിച്ച ശേഷം കര്ക്കശ നിലപാട് സ്വീകരിക്കുമെന്നും മന്ത്രി പറഞ്ഞു.
സംഭവത്തില് പ്രതിഷേധിച്ച് യു.ഡി.എഫ് പ്രവര്ത്തകര് തൊടുപുഴ പി.ഡബ്ല്യു.ഡി ഓഫീസ് ഉപരോധിച്ചു. അസി. എക്സിക്യുട്ടീവ് ഓഫീസറുടെ കസേരയില് പ്രതിഷേധക്കാര് പൂച്ചട്ടി വെച്ചു.
Related News
