ന്യൂദല്ഹി- സൗജന്യ വൈദ്യുതി വാഗ്ദാനം ചെയ്യുന്ന രാഷ്ട്രീയ പാര്ട്ടികളുടെ നടപടിയെയും 'സൗജന്യ രാഷ്ട്രീയത്തെയും' രൂക്ഷമായി വിമര്ശിച്ച് സുപ്രീം കോടതി. തമിഴ്നാട് ഇലക്ട്രിസിറ്റി ബോര്ഡ് സമര്പ്പിച്ച ഹരജി പരിഗണിക്കവെ വ്യാഴാഴ്ചയാണ് കോടതി ഈ പരാമര്ശം നടത്തിയത്. ഇത്തരം സൗജന്യ പദ്ധതികള്ക്ക് വേണ്ട പണം ആര് നല്കുമെന്നും ഇതിന്റെ സാമ്പത്തിക ബാധ്യത ആര് ഏറ്റെടുക്കുമെന്നും ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച് ചോദിച്ചു.
രാജ്യത്തെ മിക്ക സംസ്ഥാനങ്ങള്ക്കും വരുമാനക്കമ്മിയുള്ള സാഹചര്യത്തില് ഇത്തരം സൗജന്യങ്ങള് പ്രഖ്യാപിക്കുന്നത് വികസന പ്രവര്ത്തനങ്ങളെ തടസ്സപ്പെടുത്തുമെന്ന് കോടതി നിരീക്ഷിച്ചു. ദരിദ്രരെ സഹായിക്കുന്നത് മനസ്സിലാക്കാവുന്ന കാര്യമാണെന്നും എന്നാല് സാമ്പത്തിക ശേഷിയുള്ളവര്ക്കും ഇല്ലാത്തവര്ക്കും ഇടയില് വിവേചനമില്ലാതെ എല്ലാവര്ക്കും സൗജന്യങ്ങള് വിതരണം ചെയ്യുന്നതിനെ കോടതി ചോദ്യം ചെയ്തു. വികസന പദ്ധതികള്ക്കായി നീക്കിവെക്കേണ്ട പണം ഇത്തരത്തില് ചെലവാക്കുന്നത് ശരിയല്ലെന്നും ബെഞ്ച് ചൂണ്ടിക്കാട്ടി.
ജനങ്ങള്ക്ക് തൊഴിലവസരങ്ങള് സൃഷ്ടിക്കുന്നതിലായിരിക്കണം സര്ക്കാരുകള് ശ്രദ്ധ കേന്ദ്രീകരിക്കേണ്ടതെന്ന് കോടതി പറഞ്ഞു. രാവിലെ മുതല് വൈകുന്നേരം വരെ സൗജന്യ ഭക്ഷണം, സൗജന്യ സൈക്കിള്, സൗജന്യ വൈദ്യുതി എന്നിങ്ങനെ എല്ലാം നല്കാന് തുടങ്ങിയാല് ജനങ്ങളുടെ തൊഴില് സംസ്കാരത്തെ അത് എങ്ങനെ ബാധിക്കുമെന്ന് കോടതി ആശങ്ക പ്രകടിപ്പിച്ചു. ഇത്തരം നടപടികള് രാജ്യത്തിന്റെ സാമ്പത്തിക വളര്ച്ചയെ മുരടിപ്പിക്കുമെന്നും കോടതി മുന്നറിയിപ്പ് നല്കി.
ഇലക്ട്രിസിറ്റി ഭേദഗതി ചട്ടങ്ങളിലെ 2024-ലെ ചില വ്യവസ്ഥകളെ ചോദ്യം ചെയ്തുകൊണ്ട് തമിഴ്നാട് പവര് ഡിസ്ട്രിബ്യൂഷന് കോര്പ്പറേഷന് ലിമിറ്റഡ് സമര്പ്പിച്ച ഹരജിയിലാണ് ഈ നിരീക്ഷണങ്ങള് ഉണ്ടായത്. സൗജന്യങ്ങള് നല്കുന്ന രാഷ്ട്രീയ പ്രീണന നയങ്ങള്ക്കെതിരെ കോടതി നോട്ടീസ് അയച്ചു. വികസനത്തേക്കാള് ജനപ്രിയ വാഗ്ദാനങ്ങള്ക്ക് മുന്ഗണന നല്കുന്ന രീതിക്കെതിരെ ശക്തമായ നിലപാടാണ് കോടതി സ്വീകരിച്ചിരിക്കുന്നത്.
Related News
