ദുബായ്: പശ്ചിമേഷ്യയില് യുദ്ധം രൂക്ഷമായതോടെ ദുബായ്, ഖത്തര്, ഇസ്രായേല്, ഇറാന് എന്നിവിടങ്ങളിലെ വിമാനത്താവളങ്ങള് അനിശ്ചിതകാലത്തേക്ക് അടച്ചു. ഇറാഖ്, ഇസ്രായേല് വ്യോമപാതകളും അടച്ചതോടെ അന്താരാഷ്ട്ര സര്വീസുകള് പൂര്ണ്ണമായും നിലച്ചു. ഇന്ത്യയില് നിന്നുള്ള വിമാനങ്ങള് റദ്ദാക്കിയതോടെ ആയിരക്കണക്കിന് പ്രവാസികളാണ് വിമാനത്താവളങ്ങളില് കുടുങ്ങിക്കിടക്കുന്നത്.
സൗദി അറേബ്യയിലെ വിമാനത്താവളങ്ങളില് കര്ശന നിയന്ത്രണങ്ങളുണ്ട്. റിയാദ്, ജിദ്ദ, ദമ്മാം വിമാനത്താവളങ്ങള് നിലവില് പ്രവര്ത്തിക്കുന്നുണ്ടെങ്കിലും അന്താരാഷ്ട്ര സര്വീസുകള് വലിയ തോതില് തടസ്സപ്പെട്ടിരിക്കുകയാണ്. ഇറാന്, ഇറാഖ്, ഇസ്രായേല് എന്നീ രാജ്യങ്ങള് വ്യോമപാതകള് അടച്ചതോടെ സൗദിയില് നിന്നുള്ള വിമാനങ്ങള്ക്കും ദീര്ഘദൂര പാതകള് സ്വീകരിക്കേണ്ടി വരുന്നു. ഇത് വിമാനങ്ങള് വൈകുന്നതിനും സര്വീസുകള് വെട്ടിക്കുറയ്ക്കുന്നതിനും കാരണമായിട്ടുണ്ട്. സൗദി അറേബ്യയുടെ ദേശീയ വിമാനക്കമ്പനിയായ സൗദിയ പല അന്താരാഷ്ട്ര സര്വീസുകളും സുരക്ഷാ കാരണങ്ങളാല് താല്ക്കാലികമായി നിര്ത്തിവെച്ചിരിക്കുകയാണ്.
എയര് ഇന്ത്യ, ഇന്ഡിഗോ, എയര് ഇന്ത്യ എക്സ്പ്രസ് എന്നിവ ഗള്ഫ് മേഖലയിലേക്കുള്ള സര്വീസുകള് പലതും റദ്ദാക്കി. നിലവില് സൗദിയില് നിന്ന് ഇന്ത്യയിലേക്ക് വരാന് ആഗ്രഹിക്കുന്നവര്ക്ക് ടിക്കറ്റുകള് ലഭിക്കാന് പ്രയാസമാണ്. ലഭ്യമായ സര്വീസുകളില് ഇന്ധന സര്ചാര്ജ് വര്ദ്ധിച്ചതിനാല് ടിക്കറ്റ് നിരക്ക് കുത്തനെ ഉയര്ന്നിട്ടുണ്ട്.
വിമാനത്താവളത്തിലേക്ക് പോകുന്നതിന് മുന്പ് നിങ്ങളുടെ വിമാനത്തിന്റെ നിലവിലെ അവസ്ഥ അതത് വിമാനക്കമ്പനികളുടെ വെബ്സൈറ്റ് വഴിയോ ആപ്പുകള് വഴിയോ പരിശോധിക്കണം. അടിയന്തരമായി രാജ്യം വിടേണ്ട സാഹചര്യം വന്നാല് പാസ്പോര്ട്ടും വിസ രേഖകളും കൈവശം കരുതുക.
റിയാദിലെ ഇന്ത്യന് എംബസി പുറപ്പെടുവിച്ച ജാഗ്രതാ നിര്ദ്ദേശങ്ങള് കര്ശനമായി പാലിക്കുക. അനാവശ്യമായി വിമാനത്താവളങ്ങളില് പോയി തടിച്ചുകൂടരുതെന്ന് അധികൃതര് നിര്ദ്ദേശിക്കുന്നു.
Related News
