റിയാദ്: സെന്റര് ഫോര് ഇന്ഫര്മേഷന് ആന്ഡ് ഗൈഡന്സ് ഇന്ത്യ (സിജി) റിയാദ് ചാപ്റ്ററിന്റെ ആഭിമുഖ്യത്തില് ഇഫ്താര് സംഗമം സംഘടിപ്പിച്ചു. മലാസിലെ ചെറീസ് ഓഡിറ്റോറിയത്തില് നടന്ന ചടങ്ങില് സിജി കുടുംബാംഗങ്ങള്ക്ക് പുറമെ റിയാദിലെ സാമൂഹിക, സാംസ്കാരിക, വിദ്യാഭ്യാസ രംഗത്തെ പ്രമുഖരും വിവിധ സംഘടനാ പ്രതിനിധികളും പങ്കെടുത്തു.
സിജി റിയാദ് ചാപ്റ്റര് ചീഫ് കോര്ഡിനേറ്റര് പി.കെ. മുസ്തഫ മാനന്തേരി ചടങ്ങില് സ്വാഗതം ആശംസിച്ചു. അല് യാസ്മിന് സ്കൂള് പ്രിന്സിപ്പല് ഡോ. സലീല് ഹസന് റമദാന് സന്ദേശം നല്കി. വ്രതാനുഷ്ഠാനത്തിന്റെ ആത്മീയതയും സാമൂഹിക പ്രതിബദ്ധതയും അദ്ദേഹം തന്റെ പ്രഭാഷണത്തില് ഊന്നിപ്പറഞ്ഞു.
കഴിഞ്ഞ മൂന്ന് പതിറ്റാണ്ടിലേറെയായി സിജി ആഗോളതലത്തില് നടപ്പിലാക്കിവരുന്ന വൈവിധ്യമാര്ന്ന പദ്ധതികളെക്കുറിച്ച് മുന് ചെയര്മാന് റഷീദലി പ്രവര്ത്തന റിപ്പോര്ട്ട് അവതരിപ്പിച്ചു. സമൂഹത്തിലെ പാര്ശ്വവല്ക്കരിക്കപ്പെട്ട വിഭാഗങ്ങളെ വിദ്യാഭ്യാസ-തൊഴില് മേഖലകളില് മുന്നിരയിലെത്തിക്കാന് സിജി നടത്തിയ ഇടപെടലുകളും, വിവിധ ആഗോള ചാപ്റ്ററുകളുടെ സഹകരണത്തോടെ നടപ്പിലാക്കിയ വിപ്ലവകരമായ മാറ്റങ്ങളും അദ്ദേഹം റിപ്പോര്ട്ടില് വിശദീകരിച്ചു.
ചടങ്ങില് ചെയര്മാന് മുനീബ് ബി.എച്ച് നന്ദി രേഖപ്പെടുത്തി. പ്രമുഖ വ്യക്തിത്വങ്ങളുടെ സാന്നിധ്യം കൊണ്ട് ശ്രദ്ധേയമായ സംഗമം റിയാദിലെ മലയാളി സമൂഹത്തിനിടയിലെ സൗഹൃദം പുതുക്കുന്ന വേദിയായി മാറി.
Related News
