ജിദ്ദ: വയനാട് ദുരിതബാധിതര്ക്കായി മുസ്ലിം ലീഗിന്റെ നേതൃത്വത്തില് നടപ്പിലാക്കിയ പുനരധിവാസ പ്രവര്ത്തനങ്ങള് സമാനതകളില്ലാത്ത കാരുണ്യപ്രവര്ത്തനമാണെന്ന് വേള്ഡ് കെ.എം.സി.സി പ്രസിഡന്റ് കെ.പി. മുഹമ്മദ് കുട്ടി പറഞ്ഞു. സര്ക്കാരിന് പോലും ചെയ്യാന് കഴിയാത്ത രീതിയിലുള്ള മികച്ച പ്രവര്ത്തനങ്ങളാണ് സംഘടന കാഴ്ചവെച്ചതെന്നും അദ്ദേഹം കൂട്ടിച്ചേര്ത്തു.
ചെമ്മാട് ദയാ ചാരിറ്റി സെന്റര് ജിദ്ദ ചാപ്റ്റര് സംഘടിപ്പിച്ച ഇഫ്താര് സംഗമവും ഒരു മാസം നീണ്ടുനില്ക്കുന്ന വിഭവ സമാഹരണ കാമ്പയിനും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ദയാ ചാരിറ്റി സെന്റര് പുതുതായി ആരംഭിക്കുന്ന 'പൂക്കോയ തങ്ങള് പാലിയേറ്റീവ്' സെന്ററിനുള്ള ഫണ്ട് സമാഹരണ ഉദ്ഘാടനവും ചടങ്ങില് നടന്നു. മോഡേണ് ഫുഡ് ട്രേഡിംഗ് ഗ്രൂപ്പ് എം.ഡി ഫിറോസ് മാനുപ്പയില് നിന്ന് ആദ്യ സംഭാവന സ്വീകരിച്ച് കെ.പി. മുഹമ്മദ് കുട്ടി ഉദ്ഘാടനം നിര്വ്വഹിച്ചു.
ബലദ് ഹോളിഡേയ്സ് ഓഡിറ്റോറിയത്തില് നടന്ന ചടങ്ങില് പ്രസിഡന്റ് സീതി കൊളക്കാടന് അധ്യക്ഷത വഹിച്ചു. ജിദ്ദ കെ.എം.സി.സി ജനറല് സെക്രട്ടറി വി.പി. മുസ്തഫ മുഖ്യപ്രഭാഷണം നടത്തി. സക്കീര് കുന്നുമ്മല്, ഫിറോസ് മാനുപ്പ, മജീദ് കള്ളിയില്, ഉനൈസ് കരുമ്പില്, പി.കെ. സുഹൈല്, നൂര് മുഹമ്മദ് പാലത്തിങ്ങല്, ജാഫര് വെന്നിയൂര്, നാസര് മമ്പുറം, കെ.വി. ജംഷീര്, പി.എം. അഷ്റഫ്, ശംസീര് ചെട്ടിപ്പടി, എം.സി. സുഹൈല് എന്നിവര് സംസാരിച്ചു.
ജനറല് സെക്രട്ടറി മജീദ് പുകയൂര് സ്വാഗതവും മുഹമ്മദ് റഫീഖ് കൂളത്ത് നന്ദിയും പറഞ്ഞു. ശരീഫ് തെന്നല ഖിറാഅത്ത് നടത്തി.
Related News
