ന്യൂഡല്ഹി: ഇറാന്-ഇസ്രായേല്-അമേരിക്ക സംഘര്ഷം രൂക്ഷമാകുന്ന സാഹചര്യത്തില് ഗള്ഫ് രാജ്യങ്ങളിലെ ഇന്ത്യന് പൗരന്മാരുടെ സുരക്ഷ ഉറപ്പാക്കാന് അടിയന്തര നയതന്ത്ര നടപടികള് സ്വീകരിക്കണമെന്ന് എ.ഐ.സി.സി ജനറല് സെക്രട്ടറി കെ.സി. വേണുഗോപാല് എം.പി. പശ്ചിമേഷ്യയില് കുടുങ്ങിക്കിടക്കുന്നവരില് മടങ്ങാന് ആഗ്രഹിക്കുന്നവരെ സുരക്ഷിതമായി നാട്ടിലെത്തിക്കാന് നടപടി വേണമെന്നാവശ്യപ്പെട്ട് അദ്ദേഹം പ്രധാനമന്ത്രിക്കും വിദേശകാര്യമന്ത്രിക്കും കത്ത് നല്കി.
നിലവിലെ യുദ്ധസമാനമായ സാഹചര്യം പ്രവാസികള്ക്കിടയില്, പ്രത്യേകിച്ച് കേരളത്തില് നിന്നുള്ളവരില് വലിയ ആശങ്കയും ഭീതിയും സൃഷ്ടിച്ചിരിക്കുകയാണ്. ലക്ഷക്കണക്കിന് ഇന്ത്യന് പൗരന്മാരാണ് പശ്ചിമേഷ്യന് രാജ്യങ്ങളില് വിവിധ തൊഴില് മേഖലകളില് ജോലി ചെയ്യുന്നത്. അവരുടെ സുരക്ഷയും ക്ഷേമവും ഉറപ്പാക്കുക എന്നത് കേന്ദ്ര സര്ക്കാരിന്റെ അടിയന്തര ഉത്തരവാദിത്വമാണെന്ന് കെ.സി. വേണുഗോപാല് കത്തില് ചൂണ്ടിക്കാട്ടി.
സ്വദേശത്തേക്ക് മടങ്ങാന് ആഗ്രഹിക്കുന്ന ഇന്ത്യന് പൗരന്മാര്ക്ക് സുരക്ഷിതമായ യാത്രാ സൗകര്യം ഉറപ്പാക്കാന് കേന്ദ്ര സര്ക്കാര് അടിയന്തരമായി ഇടപെടണം. ഗള്ഫ് മേഖലയിലേക്ക് സംഘര്ഷം വ്യാപിക്കാനുള്ള സാധ്യത കണക്കിലെടുത്ത് അവിടങ്ങളിലെ ഇന്ത്യന് എംബസികളും കോണ്സുലേറ്റുകളും പൗരന്മാരുമായി നിരന്തരം ബന്ധം പുലര്ത്തണം. അത്യാവശ്യ ഘട്ടങ്ങളില് പ്രവാസികള്ക്ക് കൃത്യമായ സഹായം എത്തിക്കാനുള്ള നടപടികള് മുന്കൂട്ടി ക്രമീകരിക്കണമെന്നും അദ്ദേഹം ആവശ്യപ്പെട്ടു.
Related News
