ടെഹ്റാന്/ജെറുസലേം: അമേരിക്കയും ഇസ്രായേലും സംയുക്തമായി നടത്തുന്ന ആക്രമണങ്ങളില് ഇറാനില് ഇതുവരെ 555 പേര് കൊല്ലപ്പെട്ടതായി ഇറാനിയന് റെഡ് ക്രസന്റ് അറിയിച്ചു. കഴിഞ്ഞ രണ്ട് ദിവസമായി തുടരുന്ന വ്യോമാക്രമണങ്ങളില് രാജ്യത്തെ 131 നഗരങ്ങളെ ബാധിച്ചതായും മാനുഷിക സേവന സംഘടനയായ റെഡ് ക്രസന്റ് തങ്ങളുടെ ടെലഗ്രാം ചാനലിലൂടെ വ്യക്തമാക്കി.
ഇറാനിലെ വിവിധ ഭാഗങ്ങളില് ലക്ഷ്യം വെച്ചുള്ള 'സയണിസ്റ്റ്-അമേരിക്കന് ഭീകരാക്രമണങ്ങളില്' തങ്ങളുടെ പ്രിയപ്പെട്ട പൗരന്മാര്ക്ക് ജീവന് നഷ്ടമായതില് ഖേദിക്കുന്നതായും സംഘടന അറിയിച്ചു.
ഇസ്രായേലിലും മിസൈല് പതനം; മരണം ഒന്പതായി
അതേസമയം, ഞായറാഴ്ച ഇറാന് തൊടുത്തുവിട്ട ബാലിസ്റ്റിക് മിസൈല് ജെറുസലേമിന് പടിഞ്ഞാറുള്ള ബെയ്റ്റ് ഷെമേഷിലെ ജനവാസ മേഖലയില് പതിച്ചു. ആക്രമണത്തില് ഒന്പത് പേര് കൊല്ലപ്പെടുകയും ഇരുപതിലധികം പേര്ക്ക് പരിക്കേല്ക്കുകയും ചെയ്തു. തകര്ന്ന കെട്ടിടങ്ങള്ക്കിടയില് നിന്ന് കൂടുതല് മൃതദേഹങ്ങള് കണ്ടെടുത്തതോടെയാണ് മരണസംഖ്യ ഉയര്ന്നതെന്ന് ഇസ്രായേല് രക്ഷാസേനയായ മഗന് ഡേവിഡ് അഡോം അറിയിച്ചു. പരിക്കേറ്റവരെ ആശുപത്രിയിലേക്ക് മാറ്റുന്നതിനായി ഇസ്രായേല് സൈന്യം ഹെലികോപ്റ്ററുകളും മെഡിക്കല് സംഘങ്ങളെയും സ്ഥലത്ത് വിന്യസിച്ചിട്ടുണ്ട്.
അത്യന്തം പ്രഹരശേഷിയുള്ള ഇറാനിയന് മിസൈലിനെ പ്രതിരോധിക്കാന് ഇസ്രായേലിന്റെ മിസൈല് വിരുദ്ധ സംവിധാനങ്ങള്ക്ക് സാധിക്കാതെ പോയത് സൈന്യം ഗൗരവത്തോടെയാണ് കാണുന്നത്. ബെയ്റ്റ് ഷെമേഷിലുണ്ടായ ഈ സുരക്ഷാ വീഴ്ചയെക്കുറിച്ച് അന്വേഷണം ആരംഭിച്ചതായി ഇസ്രായേല് പ്രതിരോധ സേന വ്യക്തമാക്കി.
Related News
