കുവൈറ്റ് സിറ്റി- കുവൈറ്റില്‍ യുഎസ് വ്യോമസേനയുടെ മൂന്ന് എ15 യുദ്ധവിമാനങ്ങള്‍ തകര്‍ന്നുവീണതായി യുഎസ് സെന്‍ട്രല്‍ കമാന്‍ഡ് സ്ഥിരീകരിച്ചു. ഇറാനുമായുള്ള പോരാട്ടത്തിനിടയില്‍ കുവൈറ്റ് വ്യോമപ്രതിരോധ സേനയ്ക്ക് പറ്റിയ അബദ്ധത്തെത്തുടര്‍ന്ന് വിമാനങ്ങള്‍ വെടിവെച്ചിടുകയായിരുന്നുവെന്ന് സൈന്യം വെളിപ്പെടുത്തി. യുദ്ധം തുടങ്ങിയതിനുശേഷം ആദ്യമായാണ് അമേരിക്കന്‍ വിമാനങ്ങള്‍ ഇത്തരത്തില്‍ തകര്‍ക്കപ്പെടുന്നത്.

വിമാനത്തിലുണ്ടായിരുന്ന ആറ് ജീവനക്കാരും തകരുന്നതിന് മുന്‍പ് പാരച്യൂട്ട് വഴി പുറത്തേക്ക് ചാടി രക്ഷപ്പെട്ടു. ഇവരെ സുരക്ഷിതമായി കണ്ടെത്തിയതായും എല്ലാവരുടെയും ആരോഗ്യനില തൃപ്തികരമാണെന്നും അധികൃതര്‍ അറിയിച്ചു. സഖ്യകക്ഷികള്‍ തമ്മിലുള്ള ഏകോപനത്തിലുണ്ടായ പാളിച്ചയാണ് അബദ്ധവെടിക്ക് കാരണമായതെന്ന് വിലയിരുത്തപ്പെടുന്നു.