ന്യൂഡല്‍ഹി: മിഡില്‍ ഈസ്റ്റ് രാജ്യങ്ങളിലെ നിലവിലെ അസാധാരണ സാഹചര്യം കണക്കിലെടുത്ത് 10, 12 ക്ലാസുകളിലെ ബോര്‍ഡ് പരീക്ഷകള്‍ മാറ്റിവെക്കാന്‍ സെന്‍ട്രല്‍ ബോര്‍ഡ് ഓഫ് സെക്കന്‍ഡറി എജ്യുക്കേഷന്‍ തീരുമാനിച്ചു. 2026 മാര്‍ച്ച് 5 (വ്യാഴം), മാര്‍ച്ച് 6 (വെള്ളി) തീയതികളില്‍ നടക്കേണ്ടിയിരുന്ന പരീക്ഷകളാണ് നിലവില്‍ മാറ്റിവെച്ചിരിക്കുന്നത്.

സൗദി അറേബ്യ, യുഎഇ, ഒമാന്‍, ഖത്തര്‍, കുവൈറ്റ്, ബഹ്റൈന്‍, ഇറാന്‍ എന്നീ രാജ്യങ്ങളിലെ സിബിഎസ്ഇ സ്‌കൂളുകള്‍ക്കാണ് ഈ തീരുമാനം ബാധകം.

മാര്‍ച്ച് 5, 6 തീയതികളില്‍ ഷെഡ്യൂള്‍ ചെയ്തിരുന്ന 10, 12 ക്ലാസുകളിലെ പരീക്ഷകളാണ് മാറ്റിയത്. പരീക്ഷകളുടെ പുതുക്കിയ തീയതികള്‍ പിന്നീട് ഔദ്യോഗികമായി അറിയിക്കും.

മാര്‍ച്ച് 5-ന് ബോര്‍ഡ് സാഹചര്യം വീണ്ടും വിലയിരുത്തുമെന്നും, മാര്‍ച്ച് 7 മുതലുള്ള പരീക്ഷകളുടെ കാര്യത്തില്‍ അന്ന് തീരുമാനമെടുക്കുമെന്നും സിബിഎസ്ഇ അറിയിച്ചു. പരീക്ഷാ കണ്‍ട്രോളര്‍ ഡോ. സന്യം ഭരദ്വാജ് ആണ് ഇതുസംബന്ധിച്ച സര്‍ക്കുലര്‍ പുറത്തിറക്കിയത്. കൂടുതല്‍ വിവരങ്ങള്‍ക്കായി വിദ്യാര്‍ത്ഥികള്‍ തങ്ങളുടെ സ്‌കൂളുകളുമായി ബന്ധപ്പെടാന്‍ നിര്‍ദ്ദേശമുണ്ട്.