ടെഹ്റാന്-ഇറാന്റെ തലസ്ഥാനമായ ടെഹ്റാന്റെ കിഴക്കന് മേഖലയില് ചൊവ്വാഴ്ച ശക്തമായ സ്ഫോടനമുണ്ടായതായും പ്രദേശത്ത് നിന്ന് കറുത്ത പുക ഉയരുന്നതായും റിപ്പോര്ട്ടുകള് പുറത്തുവന്നു. ഏത് കേന്ദ്രമാണ് ആക്രമിക്കപ്പെട്ടതെന്ന കാര്യത്തില് ഇറാന് സര്ക്കാര് ഇതുവരെ ഔദ്യോഗിക വിശദീകരണം നല്കിയിട്ടില്ല. ശനിയാഴ്ച ആരംഭിച്ച ഇസ്രായേല്-യുഎസ് ആക്രമണങ്ങളില് പരമോന്നത നേതാവ് കൊല്ലപ്പെട്ടതിന് പിന്നാലെ ഇറാന്റെ റെവല്യൂഷണറി ഗാര്ഡ് കോര്പ്സിന് കനത്ത ആഘാതമാണ് നേരിടുന്നത്. ഐആര്ജിസി കമാന്ഡര് ഇന് ചീഫ് ഉള്പ്പെടെ പത്തിലധികം മുതിര്ന്ന സൈനിക ഉദ്യോഗസ്ഥര് കൊല്ലപ്പെട്ടതായാണ് വിവരം.
ടെഹ്റാനിലെയും മറ്റ് നഗരങ്ങളിലെയും ഐആര്ജിസിയുടെ നിരവധി ആസ്ഥാനങ്ങളും പരിശീലന കേന്ദ്രങ്ങളും തകര്ക്കപ്പെട്ടത് ഇറാന്റെ സൈനിക ശേഷിയെ സാരമായി ബാധിച്ചിട്ടുണ്ട്. എന്നിരുന്നാലും, തങ്ങള് തിരിച്ചടി തുടരുകയാണെന്ന് ഐആര്ജിസി പ്രസ്താവനയിലൂടെ അറിയിച്ചു. തിങ്കളാഴ്ച രാത്രി കുവൈറ്റിലെ ഒരു സൈനിക താവളത്തിന് നേരെയും ദുബായിലെ യുഎസ് സൈനിക കേന്ദ്രത്തിന് നേരെയും ആക്രമണം നടത്തിയതായി ഐആര്ജിസി അവകാശപ്പെട്ടു. നിലവില് സൈനിക-രാഷ്ട്രീയ കേന്ദ്രങ്ങള്ക്ക് പുറമെ ജനവാസ മേഖലകളെയും യുദ്ധം ബാധിച്ചു തുടങ്ങിയിട്ടുണ്ട്.
മേഖലയില് സംഘര്ഷം അതിരൂക്ഷമായി തുടരുന്ന സാഹചര്യത്തില് ഇറാന്റെ പ്രതിരോധ സംവിധാനങ്ങള് വലിയ വെല്ലുവിളിയാണ് നേരിടുന്നത്. മുതിര്ന്ന നേതാക്കളുടെ വിയോഗം സൈന്യത്തിനുള്ളില് വലിയ ആശയക്കുഴപ്പമുണ്ടാക്കിയിട്ടുണ്ട്. അതേസമയം, തിരിച്ചടിക്കാനുള്ള ഇറാന്റെ ശ്രമങ്ങള് ഗള്ഫ് മേഖലയിലാകെ സുരക്ഷാ ഭീഷണി ഉയര്ത്തുന്നു. വരും മണിക്കൂറുകളില് കൂടുതല് ശക്തമായ സൈനിക നീക്കങ്ങള് ഇരുപക്ഷത്തുനിന്നും ഉണ്ടായേക്കാമെന്നാണ് അന്താരാഷ്ട്ര നിരീക്ഷകര് വിലയിരുത്തുന്നത്.
Related News
