.jpg)
ടെല് അവീവ്- ലെബനനില് കൂടുതല് പ്രദേശങ്ങളുടെ നിയന്ത്രണം ഏറ്റെടുക്കാന് ഇസ്രായേല് സൈന്യത്തിന് അനുമതി നല്കിയതായി പ്രതിരോധ മന്ത്രി ഇസ്രായേല് കാറ്റ്സ് വ്യക്തമാക്കി. 2024 നവംബറില് ഹിസ്ബുള്ളയുമായി ഒപ്പിട്ട വെടിനിര്ത്തല് കരാറിന് ശേഷവും അഞ്ച് തന്ത്രപ്രധാന മേഖലകളില് ഇസ്രായേല് തങ്ങളുടെ സൈനിക സാന്നിധ്യം നിലനിര്ത്തിയിരുന്നു. ഇതിന് പുറമെയാണ് ഇപ്പോള് കൂടുതല് മുന്നേറ്റത്തിന് സൈന്യത്തിന് പച്ചക്കൊടി കാട്ടിയിരിക്കുന്നത്. ഹിസ്ബുള്ളയുടെ ഭാഗത്തുനിന്നുണ്ടാകുന്ന പ്രകോപനങ്ങള് തടയുന്നതിനായുള്ള 'ഫോര്വേഡ് ഡിഫന്സീവ്' നിലപാടാണ് ഇതെന്ന് ഇസ്രായേല് സൈനിക വക്താവ് അറിയിച്ചു.
ലെബനനിലെ സൈനിക നീക്കങ്ങള്ക്കൊപ്പം തന്നെ ഇറാന് നേരെയുള്ള ആക്രമണങ്ങളും ശക്തമായി തുടരുമെന്ന് ഇസ്രായേല് അറിയിച്ചു. വരും ആഴ്ചകളിലും ഇറാനിലെ തന്ത്രപ്രധാന കേന്ദ്രങ്ങളെ ലക്ഷ്യമിട്ടുള്ള വ്യോമാക്രമണങ്ങള് തുടരാന് സൈന്യം സജ്ജമാണെന്ന് വക്താവ് വ്യക്തമാക്കി. ഇറാന് നടത്തുന്ന നീക്കങ്ങള്ക്ക് തത്തുല്യമായ തിരിച്ചടി നല്കുകയാണ് ലക്ഷ്യം. എന്നാല് ഇറാന്റെ മണ്ണിലേക്ക് നേരിട്ട് കരസേനയെ അയക്കുന്ന കാര്യം നിലവില് ഇസ്രായേലിന്റെ പരിഗണനയിലില്ല. അത്തരമൊരു നീക്കം പ്രായോഗികമല്ലെന്നാണ് സൈനിക വൃത്തങ്ങള് നല്കുന്ന സൂചന.
അതേസമയം, മേഖലയിലെ സംഘര്ഷം ലഘൂകരിക്കുന്നതിന്റെ ഭാഗമായി ലെബനന് സര്ക്കാര് പുതിയ നിയന്ത്രണങ്ങള് ഏര്പ്പെടുത്തി. ഹിസ്ബുള്ളയുടെ സൈനികവും സുരക്ഷാപരവുമായ പ്രവര്ത്തനങ്ങള് രാജ്യത്ത് നിരോധിച്ചതായി ലെബനന് പ്രധാനമന്ത്രി അറിയിച്ചു. ഹിസ്ബുള്ളയുടെ പക്കലുള്ള ആയുധങ്ങള് പിടിച്ചെടുക്കാനും സൈനിക പ്രവര്ത്തനങ്ങള് രാഷ്ട്രീയ പ്രവര്ത്തനങ്ങളിലേക്ക് മാത്രമായി പരിമിതപ്പെടുത്താനും ലെബനന് മന്ത്രിസഭ തീരുമാനിച്ചിട്ടുണ്ട്. ലിതാനി നദിക്ക് വടക്ക് ഭാഗത്തുള്ള ആയുധ നിയന്ത്രണം ഉറപ്പാക്കാന് ലെബനന് സൈന്യത്തോട് സര്ക്കാര് നിര്ദ്ദേശിച്ചു.
Related News
