റിയാദ്: മുന്‍ കേന്ദ്രമന്ത്രിയും മുതിര്‍ന്ന കോണ്‍ഗ്രസ് നേതാവുമായ കെ.പി. ഉണ്ണികൃഷ്ണന്റെ നിര്യാണത്തില്‍ ഒഐസിസി റിയാദ് സെന്‍ട്രല്‍ കമ്മിറ്റി അനുശോചനം രേഖപ്പെടുത്തി. മൂല്യാധിഷ്ഠിത രാഷ്ട്രീയത്തിന്റെ ഉജ്ജ്വല പ്രതിനിധിയായിരുന്ന അദ്ദേഹത്തിന്റെ വിയോഗം ദേശീയ രാഷ്ട്രീയത്തിനും ജനാധിപത്യ മൂല്യങ്ങള്‍ക്കും നികത്താനാവാത്ത നഷ്ടമാണെന്ന് കമ്മിറ്റി പ്രസ്താവനയില്‍ പറഞ്ഞു.

ദീര്‍ഘകാലം വടകര മണ്ഡലത്തെ പ്രതിനിധീകരിച്ച അദ്ദേഹം, പാര്‍ലമെന്റിലെ ഗൗരവമേറിയ ഇടപെടലുകള്‍ കൊണ്ടും നിര്‍ണ്ണായകമായ ചര്‍ച്ചകള്‍ കൊണ്ടും ശ്രദ്ധേയനായിരുന്നു. രാഷ്ട്രീയ അഭിപ്രായവ്യത്യാസങ്ങള്‍ക്കതീതമായി എല്ലാവരുടെയും ബഹുമാനം പിടിച്ചുപറ്റിയ നേതാവായിരുന്നു അദ്ദേഹം. പൊതുജീവിതത്തില്‍ പുലര്‍ത്തിയ ശുദ്ധിയും സുതാര്യതയും അദ്ദേഹത്തെ എന്നും വേറിട്ടുനിര്‍ത്തുമെന്ന് ഒഐസിസി വിലയിരുത്തി.

പ്രവാസി മലയാളികളുടെ പ്രശ്‌നങ്ങളില്‍ അദ്ദേഹം കാട്ടിയ കരുതലും സജീവമായ ഇടപെടലുകളും കമ്മിറ്റി പ്രത്യേകം അനുസ്മരിച്ചു. ഗള്‍ഫ് രാജ്യങ്ങളിലെ തൊഴിലാളികളുടെ അവകാശങ്ങള്‍ക്കും ക്ഷേമത്തിനുമായി അദ്ദേഹം കൈക്കൊണ്ട നിലപാടുകള്‍ എക്കാലവും പ്രസക്തമാണ്. പ്രവാസി സമൂഹവുമായി എന്നും ഹൃദയബന്ധം പുലര്‍ത്തിയിരുന്ന നേതാവായിരുന്നു കെ.പി. ഉണ്ണികൃഷ്ണനെന്നും ഒഐസിസി അനുസ്മരിച്ചു.