ബഗ്ദാദ്- മേഖലയില് യുദ്ധം കൊടുമ്പിരിക്കൊള്ളുന്നതിനിടെ, ഇറാഖിലെ കുര്ദിസ്ഥാന് മേഖലയുടെ തലസ്ഥാനമായ ഇര്ബിലിലെ യുഎസ് സൈനിക കേന്ദ്രങ്ങള്ക്ക് നേരെ ഡ്രോണ് ആക്രമണം നടത്തിയതായി ഇറാഖിലെ സായുധ വിഭാഗമായ 'സരായാ ഔലിയ അല്-ദം' അറിയിച്ചു. എര്ബില് വിമാനത്താവളത്തിലെ യുഎസ് താവളത്തെയും സൈനികര് താമസിക്കുന്ന ഒരു ഹോട്ടലിനെയുമാണ് ഇവര് ലക്ഷ്യം വെച്ചത്. ഇതിനുപുറമെ ജോര്ദാനിലെ ഒരു തന്ത്രപ്രധാന കേന്ദ്രത്തിന് നേരെയും ഡ്രോണ് ആക്രമണം നടത്തിയതായി ഈ ഗ്രൂപ്പ് അവകാശപ്പെട്ടു. എന്നാല് ഈ ഡ്രോണുകളെ ഇറാഖി വ്യോമ പ്രതിരോധ സേന വെടിവെച്ചിട്ടതായാണ് റിപ്പോര്ട്ടുകള് സൂചിപ്പിക്കുന്നത്.
അതേസമയം, ബാബില് പ്രവിശ്യയിലെ ജുര്ഫ് അല്-സഖറിലും അന്ബാര് പ്രവിശ്യയിലെ ഖൈമിലുമുള്ള പോപ്പുലര് മൊബിലൈസേഷന് ഫോഴ്സിന്റെ ആസ്ഥാനങ്ങള്ക്ക് നേരെ യുഎസ് സേന ആക്രമണം നടത്തിയെങ്കിലും നാശനഷ്ടങ്ങള് റിപ്പോര്ട്ട് ചെയ്തിട്ടില്ല. ഇറാനെതിരായ അമേരിക്കന്-ഇസ്രായേല് നീക്കങ്ങളുടെ നാലാം ദിവസമാണ് ഈ സംഭവവികാസങ്ങള് ഉണ്ടാകുന്നത്. തങ്ങളുടെ രാജ്യത്തെ വിദേശ സൈനിക താവളങ്ങളോ നയതന്ത്ര കാര്യാലയങ്ങളോ ആക്രമിക്കാന് അനുവദിക്കില്ലെന്നും നിലവിലെ സംഘര്ഷങ്ങളിലേക്ക് ഇറാഖിനെ വലിച്ചിഴക്കരുതെന്നും ഇറാഖ് സര്ക്കാര് ആവര്ത്തിച്ച് വ്യക്തമാക്കിയിട്ടുണ്ട്. ഇതിനിടെ, കുവൈറ്റ്, ഖത്തര്, യുഎഇ തുടങ്ങി വിവിധ രാജ്യങ്ങളിലെ യുഎസ് സൈനിക കേന്ദ്രങ്ങളെ ലക്ഷ്യമിട്ട് വലിയ തോതിലുള്ള തിരിച്ചടി നല്കിയതായി ഇറാന് റെവല്യൂഷണറി ഗാര്ഡും അറിയിച്ചു.
Related News
