ജിദ്ദ- നാളെ (വെള്ളിയാഴ്ച) പുലര്‍ച്ചെ ജിദ്ദയിലെ ആകാശം ഒരു അപൂര്‍വ്വ സുന്ദര നിമിഷത്തിന് സാക്ഷ്യം വഹിക്കും. ഭൂമിയില്‍ നിന്നും ഏകദേശം 400 കിലോമീറ്ററിലധികം ഉയരത്തില്‍ കറങ്ങിക്കൊണ്ടിരിക്കുന്ന അന്താരാഷ്ട്ര ബഹിരാകാശ നിലയം ജിദ്ദക്ക് മുകളിലൂടെ കടന്നുപോകും. പുലര്‍ച്ചെ കൃത്യം 05:48:59-ന് വടക്കുപടിഞ്ഞാറന്‍ ചക്രവാളത്തില്‍ പ്രത്യക്ഷപ്പെടുന്ന ഈ 'തിളങ്ങുന്ന ബിന്ദു' 6 മിനിറ്റും 19 സെക്കന്‍ഡും ആകാശത്ത് ദൃശ്യമാകും. നഗ്‌നനേത്രങ്ങള്‍ കൊണ്ട് തന്നെ ആര്‍ക്കും ഈ കാഴ്ച വ്യക്തമായി കാണാന്‍ സാധിക്കുമെന്നതാണ് പ്രത്യേകത.

ജിദ്ദ അസ്ട്രോണമിക്കല്‍ സൊസൈറ്റി തലവന്‍ എന്‍ജിനീയര്‍ മാജിദ് അബു സഹറയുടെ കണക്കുകള്‍ പ്രകാരം, പുലര്‍ച്ചെ 05:52:08-ഓടെ നിലയം അതിന്റെ പരമാവധി ഉയരത്തിലെത്തും. ആകാശത്തെ മറ്റ് നക്ഷത്രങ്ങളേക്കാള്‍ തിളക്കത്തോടെയായിരിക്കും ഇതിന്റെ പ്രയാണം. വടക്കുപടിഞ്ഞാറ് നിന്ന് തുടങ്ങി വടക്കുകിഴക്ക് വഴി സഞ്ചരിച്ച് 05:55:18-ഓടെ കിഴക്ക്-തെക്കുകിഴക്ക് ദിശയില്‍ ഇത് മറയും. വെളുത്ത നിറത്തില്‍ സ്ഥിരതയോടെ നീങ്ങുന്ന ഒരു പ്രകാശബിന്ദു പോലെയായിരിക്കും ആകാശത്ത് ഇതിനെ അനുഭവപ്പെടുക.

യഥാര്‍ത്ഥത്തില്‍ ബഹിരാകാശ നിലയത്തിന് സ്വന്തമായി പ്രകാശമില്ല. എന്നാല്‍ ഒരു ഫുട്‌ബോള്‍ മൈതാനത്തിന്റെ അത്രയും നീളമുള്ള (ഏകദേശം 109 മീറ്റര്‍) അതിലെ കൂറ്റന്‍ സോളാര്‍ പാനലുകളില്‍ സൂര്യപ്രകാശം തട്ടി പ്രതിഫലിക്കുന്നതാണ് ഈ തിളക്കത്തിന് കാരണം. മണിക്കൂറില്‍ ഏകദേശം 27,600 കിലോമീറ്റര്‍ വേഗത്തില്‍ സഞ്ചരിക്കുന്ന ഈ ഭീമന്‍ നിലയം വെറും 90 മിനിറ്റ് കൊണ്ട് ഭൂമിയെ ഒരുതവണ പൂര്‍ണ്ണമായി വലംവെക്കുന്നുണ്ട്. ജിദ്ദയിലെ നിരീക്ഷകരില്‍ നിന്നും ഏകദേശം 500 മുതല്‍ 700 കിലോമീറ്റര്‍ വരെ അകലെക്കൂടിയാണ് ഇതിന്റെ സഞ്ചാരപാത കടന്നുപോകുന്നത്.

ഈ കാഴ്ചയുടെ മറ്റൊരു രസം ഇതിന്റെ പെട്ടെന്നുള്ള അപ്രത്യക്ഷമാകലാണ്. പുലര്‍ച്ചെ സൂര്യന്‍ ചക്രവാളത്തിന് താഴെയായിരിക്കുമ്പോള്‍, ഉയരത്തില്‍ പറക്കുന്ന നിലയത്തില്‍ നേരിട്ട് വെളിച്ചം പതിക്കുന്നുണ്ടാകും. എന്നാല്‍ തെക്കുകിഴക്ക് ദിശയിലേക്ക് നീങ്ങുന്തോറും നിലയം ഭൂമിയുടെ തണലിലേക്ക് പ്രവേശിക്കും. ഇതോടെ, ചക്രവാളത്തിന് മുകളില്‍ തന്നെയാണെങ്കിലും നിരീക്ഷകരുടെ കണ്ണില്‍ നിന്ന് പെട്ടെന്ന് ഈ പ്രകാശം അണഞ്ഞതുപോലെ തോന്നും.

ഈ അപൂര്‍വ്വ നിമിഷം ക്യാമറയില്‍ പകര്‍ത്താന്‍ ആഗ്രഹിക്കുന്നവര്‍ കെട്ടിടങ്ങളില്ലാത്ത തുറസായ സ്ഥലം തിരഞ്ഞെടുക്കണമെന്ന് വിദഗ്ധര്‍ നിര്‍ദ്ദേശിക്കുന്നു. ട്രൈപോഡ് ഉപയോഗിച്ച് 10 മുതല്‍ 30 സെക്കന്‍ഡ് വരെ എക്‌സ്‌പോഷര്‍ നല്‍കിയാല്‍ ബഹിരാകാശ നിലയത്തിന്റെ പാത ഒരു നേര്‍രേഖ പോലെ മനോഹരമായി ചിത്രീകരിക്കാം. 14 mm മുതല്‍ 24 mm വരെയുള്ള വൈഡ് ആംഗിള്‍ ലെന്‍സുകള്‍ ഉപയോഗിക്കുന്നത് ആകാശത്തെ ഈ സുവര്‍ണ്ണയാത്ര പൂര്‍ണ്ണമായി പകര്‍ത്താന്‍ സഹായിക്കും.