ന്യൂഡല്ഹി: ഇസ്രായേല്-യുഎസ് വ്യോമാക്രമണത്തില് കൊല്ലപ്പെട്ട ഇറാന്റെ പരമോന്നത നേതാവ് ആയത്തുള്ള അലി ഖാംനഇയുടെ നിര്യാണത്തില് ഔദ്യോഗികമായി അനുശോചനം രേഖപ്പെടുത്തി ഇന്ത്യ. ഡല്ഹിയിലെ ഇറാന് എംബസിയില് നേരിട്ടെത്തിയ വിദേശകാര്യ സെക്രട്ടറി വിക്രം മിസ്രി അനുശോചന പുസ്തകത്തില് ഒപ്പുവെച്ചു. ഖാംനഇയുടെ മരണശേഷം ഇതാദ്യമായാണ് ഇന്ത്യ ഔദ്യോഗികമായി പ്രതികരിക്കുന്നത്.
വിദേശകാര്യ സെക്രട്ടറി എംബസിയിലെത്തി ദുഃഖം രേഖപ്പെടുത്തിയതിന് പിന്നാലെ, പശ്ചിമേഷ്യയിലെ നിലവിലെ സാഹചര്യത്തെക്കുറിച്ച് വിദേശകാര്യ മന്ത്രി എസ്. ജയശങ്കര് ഇറാന് വിദേശകാര്യ മന്ത്രി അബ്ബാസ് അരഗ്ചിയുമായി ഫോണില് സംസാരിച്ചു. മേഖലയിലെ സംഘര്ഷം ലഘൂകരിക്കേണ്ടതിന്റെ ആവശ്യകതയും ഉഭയകക്ഷി ബന്ധങ്ങളും ചര്ച്ചാവിഷയമായി.
ഖാംനഇയുടെ വധത്തില് കേന്ദ്ര സര്ക്കാര് പുലര്ത്തുന്ന മൗനത്തെ വിമര്ശിച്ച് പ്രതിപക്ഷ നേതാവ് രാഹുല് ഗാന്ധി ഉള്പ്പെടെയുള്ളവര് രംഗത്തെത്തിയിരുന്നു. ഇറാനുമായി ചരിത്രപരമായ ബന്ധമുള്ള ഇന്ത്യ കൃത്യമായ നിലപാട് എടുക്കണമെന്നും പ്രധാനമന്ത്രി മൗനം വെടിയണമെന്നും കോണ്ഗ്രസ് ആവശ്യപ്പെട്ടിരുന്നു. ഈ രാഷ്ട്രീയ വിമര്ശനങ്ങള് ശക്തമാകുന്നതിനിടയിലാണ് വിദേശകാര്യ സെക്രട്ടറി എംബസി സന്ദര്ശിച്ചത് എന്നത് ശ്രദ്ധേയമാണ്.
ഫെബ്രുവരി 28 ശനിയാഴ്ചയാണ് യുഎസും ഇസ്രായേലും സംയുക്തമായി നടത്തിയ വ്യോമാക്രമണത്തില് അലി ഖാംനഇ കൊല്ലപ്പെട്ടത്. ആക്രമണത്തില് അദ്ദേഹത്തിന്റെ മകളും മരുമകനും കൊച്ചുമക്കളും സംഭവസ്ഥലത്തുതന്നെ മരിച്ചിരുന്നു. പരിക്കേറ്റ് ചികിത്സയിലായിരുന്ന ഭാര്യ മന്സൂറ ഹജസ്ത മാര്ച്ച് 2 തിങ്കളാഴ്ചയാണ് വിടവാങ്ങിയത്.
Related News
