ന്യൂഡല്‍ഹി: മിഡില്‍ ഈസ്റ്റ് രാജ്യങ്ങളിലെ നിലവിലെ പ്രത്യേക സാഹചര്യം പരിഗണിച്ച് പന്ത്രണ്ടാം ക്ലാസ് സിബിഎസ്ഇ പരീക്ഷകള്‍ മാറ്റിവെച്ചു. ബഹ്‌റൈന്‍, ഇറാന്‍, കുവൈറ്റ്, ഒമാന്‍, ഖത്തര്‍, സൗദി അറേബ്യ, യുഎഇ എന്നീ രാജ്യങ്ങളിലെ സ്‌കൂളുകള്‍ക്കാണ് ഈ ഉത്തരവ് ബാധകം.

മാര്‍ച്ച് 9 (തിങ്കള്‍), മാര്‍ച്ച് 10 (ചൊവ്വ), മാര്‍ച്ച് 11 (ബുധന്‍) എന്നീ തീയതികളില്‍ നടക്കേണ്ടിയിരുന്ന പരീക്ഷകളാണ് മാറ്റിവെച്ചത്. പരീക്ഷകളുടെ പുതുക്കിയ തീയതികള്‍ പിന്നീട് അറിയിക്കും. മാര്‍ച്ച് 12 മുതലുള്ള പരീക്ഷകളുടെ കാര്യത്തില്‍ മാര്‍ച്ച് 10-ന് സാഹചര്യം വിലയിരുത്തിയ ശേഷം ബോര്‍ഡ് തീരുമാനമെടുക്കും.

മിഡില്‍ ഈസ്റ്റിലെ നിലവിലെ സ്ഥിതിഗതികള്‍ സൂക്ഷ്മമായി വിലയിരുത്തിയ ശേഷമാണ് പരീക്ഷാ കണ്‍ട്രോളര്‍ ഡോ. സന്യം ഭരദ്വാജ് ഈ ഉത്തരവ് പുറപ്പെടുവിച്ചത്. പരീക്ഷ സംബന്ധിച്ച കൃത്യമായ വിവരങ്ങള്‍ക്കായി വിദ്യാര്‍ത്ഥികള്‍ സ്‌കൂളുകളുമായി ബന്ധപ്പെടണമെന്നും ഔദ്യോഗിക അറിയിപ്പുകള്‍ ശ്രദ്ധിക്കണമെന്നും ബോര്‍ഡ് നിര്‍ദ്ദേശിച്ചു.