ജിസാന്: സൗഹാര്ദത്തിന്റെയും സഹവര്ത്തിത്വത്തിന്റെയും പങ്കുവെക്കലിന്റെയും പ്രസക്തി ഊന്നിപ്പറഞ്ഞുകൊണ്ട് കെ.എം.സി.സി ജിസാന് സെന്ട്രല് കമ്മിറ്റി സംഘടിപ്പിച്ച 24-ാമത് മെഗാ ഇഫ്താര് വിരുന്ന് ജനബാഹുല്യം കൊണ്ട് ശ്രദ്ധേയമായി.
ഒത്തുചേരലിന്റെ അനുകരണീയ മാതൃകയാണ് കെ.എം.സി.സി മുന്നോട്ടുവെക്കുന്നതെന്ന് സംഗമം ഉദ്ഘാടനം ചെയ്ത ഹത്തീന് ക്ലബ് ഡയറക്ടര് ബോര്ഡ് വൈസ് ചെയര്മാന് അഹമ്മദ് ഹസന് അല് സഹ്ലി അഭിപ്രായപ്പെട്ടു.
കെ.എം.സി.സി ജിസാന് സെന്ട്രല് കമ്മിറ്റി പ്രസിഡന്റ് ഷംസു പൂക്കോട്ടൂര് അധ്യക്ഷത വഹിച്ച ചടങ്ങില് ജനറല് സെക്രട്ടറി ഖാലിദ് പട്ല സ്വാഗതം ആശംസിച്ചു. ജിസാന് കെ.എം.സി.സി സംഘടിപ്പിച്ച 'അഹ്ലന് ജിസാന്' ഫാമിലി ഇവന്റിന്റെ വിജയശില്പിയും സെന്ട്രല് കമ്മിറ്റി ട്രഷററുമായ ഡോ. മന്സൂര് നാലകത്തിനുള്ള സ്നേഹോപഹാരം സൗദി കെ.എം.സി.സി സെക്രട്ടേറിയറ്റ് മെമ്പര് ഗഫൂര് വാവൂര് കൈമാറി.
കെ.എം.സി.സി സൗദി നാഷണല് കമ്മിറ്റി സെക്രട്ടറി ഹാരിസ് കല്ലായി, ചെയര്മാന് മുനീര് ഹുദവി, ബ്ലാക്ക് ആന്ഡ് വൈറ്റ് കോഫി മാനേജിങ് ഡയറക്ടര് റിയാദ് മുഹറക്ക് എന്നിവര് സംസാരിച്ചു. ജിസാനിലെ മത-സാമൂഹിക-സാംസ്കാരിക മേഖലകളിലെ നിരവധി പ്രമുഖര് വിശിഷ്ടാതിഥികളായി പങ്കെടുത്തു. ജസാഡ്കോ മസ്ജിദ് ഇമാം ഷെയ്ഖ് സയീദ് മുഹമ്മദ് ജവാദ് പ്രാര്ത്ഥനയ്ക്ക് നേതൃത്വം നല്കി.
സംഘാടക മികവ് കൊണ്ടും ചിട്ടയായ വളണ്ടിയര് സേവനം കൊണ്ടും ശ്രദ്ധേയമായ ഇഫ്താര് വിരുന്നില് സ്ത്രീകളും കുട്ടികളും ഉള്പ്പെടെ രണ്ടായിരത്തോളം ആളുകള് പങ്കെടുത്തു. സെന്ട്രല് കമ്മിറ്റി ഭാരവാഹികള്, വിവിധ ഏരിയാ കമ്മിറ്റി പ്രതിനിധികള്, വളണ്ടിയര് വിങ് അംഗങ്ങള് എന്നിവരുടെ സജീവ പ്രവര്ത്തനം പരിപാടിയുടെ വിജയത്തിന് ആക്കം കൂട്ടി. പ്രോഗ്രാം കമ്മിറ്റി ജനറല് കണ്വീനര് കൂടിയായ ഡോ. മന്സൂര് നാലകത്ത് നന്ദി പറഞ്ഞു.
