കൊച്ചി: കേരള പ്രദേശ് പ്രവാസി കോണ്‍ഗ്രസ് സംസ്ഥാന നേതൃയോഗവും നോമ്പുതുറ സംഗമവും മാര്‍ച്ച് 11 ബുധനാഴ്ച ഉച്ചകഴിഞ്ഞ് 3 മണിക്ക് എറണാകുളം സിവില്‍ ലൈന്‍ റോഡിലെ കെ.ജി.എഫ് (KGF) റെസ്റ്റോറന്റില്‍ വെച്ച് നടക്കും. സംസ്ഥാന പ്രസിഡന്റ് എല്‍.വി. അജയകുമാര്‍, ഓര്‍ഗനൈസിംഗ് ജനറല്‍ സെക്രട്ടറി ടി.ജെ. മാത്യു, സംസ്ഥാന ഭാരവാഹികളായ ബിജു കെ. മുണ്ടാടന്‍, പി.എം.എം. സിദ്ദിഖ് സമദ് എന്നിവര്‍ വാര്‍ത്താക്കുറിപ്പിലൂടെ അറിയിച്ചതാണ് ഇക്കാര്യം.

നിയമസഭാ തിരഞ്ഞെടുപ്പില്‍ പ്രവാസി കോണ്‍ഗ്രസിന് ലഭിക്കുന്ന സീറ്റുകളിലെ സ്ഥാനാര്‍ത്ഥികളുടെ വിജയത്തിനായി, മുഖ്യ രക്ഷാധികാരി ഐസക് തോമസിന്റെ നേതൃത്വത്തില്‍ പ്രത്യേക തിരഞ്ഞെടുപ്പ് സമിതി യോഗത്തില്‍ രൂപീകരിക്കും. യു.ഡി.എഫ് പ്രകടനപത്രികയില്‍ മടങ്ങിയെത്തിയ പ്രവാസികളുടെ പ്രശ്‌നങ്ങള്‍ ഉള്‍പ്പെടുത്തുന്നതിനുള്ള കരട് രേഖയും യോഗം തയ്യാറാക്കും.

വൈകുന്നേരം 6 മണിക്ക് നോമ്പുതുറ സംഗമം നടക്കും. പ്രവാസി കോണ്‍ഗ്രസ് സംസ്ഥാന പ്രസിഡന്റ് എല്‍.വി. അജയകുമാര്‍ അധ്യക്ഷത വഹിക്കുന്ന ചടങ്ങില്‍ ഡി.സി.സി പ്രസിഡന്റ് അഡ്വ. മുഹമ്മദ് ഷിയാസ് മുഖ്യതിഥിയായിരിക്കും. കോണ്‍ഗ്രസിന്റെയും പ്രവാസി കോണ്‍ഗ്രസിന്റെയും പ്രമുഖ നേതാക്കള്‍ സംഗമത്തില്‍ പങ്കെടുക്കും.