കൊല്ലം: പശ്ചിമേഷ്യയില് ഇറാനും ഇസ്രായേലും തമ്മിലുള്ള സംഘര്ഷം കടുക്കുന്നതോടെ കേരളത്തിലും പാചകവാതക വിതരണം പ്രതിസന്ധിയില്. കൊല്ലം ജില്ലയില് വാണിജ്യ സിലിണ്ടറുകളുടെ ലഭ്യത കുറഞ്ഞതോടെ ചെറുകിട ഹോട്ടലുകളും തട്ടുകടകളും ഉള്പ്പെടെയുള്ള സ്ഥാപനങ്ങള് അടച്ചുപൂട്ടലിന്റെ വക്കിലാണ്.
പ്രതിദിനം പത്തോളം സിലിണ്ടറുകള് ഉപയോഗിക്കുന്ന വലിയ ഹോട്ടലുകള് മുതല് ഒന്നോ രണ്ടോ സിലിണ്ടറുകള് കൊണ്ട് പ്രവര്ത്തിക്കുന്ന ചെറുകിട സ്ഥാപനങ്ങള് വരെ ഒരുപോലെ പ്രതിസന്ധി നേരിടുകയാണ്. റമദാന് കാലമായതിനാല് നോമ്പുതുറയുടെ പ്രധാന വിഭവങ്ങളായ സമൂസ ഉള്പ്പെടെയുള്ള എണ്ണപ്പലഹാരങ്ങളുടെ നിര്മ്മാണം പലയിടത്തും തടസ്സപ്പെട്ടു. വരും ദിവസങ്ങളില് പലഹാരങ്ങളുടെ ലഭ്യത പൂര്ണ്ണമായും ഇല്ലാതാകുമെന്ന ആശങ്കയിലാണ് വ്യാപാരികള്.
പാചകവാതകത്തിന് വില കൂടുമെന്ന പ്രതീക്ഷയില് ഏജന്സികള് ബോധപൂര്വ്വം സിലിണ്ടറുകള് പൂഴ്ത്തിവെക്കുകയാണോ എന്ന സംശയവും കച്ചവടക്കാര് ഉയര്ത്തുന്നുണ്ട്. രണ്ട് ദിവസമായി വാണിജ്യ സിലിണ്ടറുകള് ഒട്ടും കിട്ടാനില്ലെന്നാണ് 'പ്രവാസി പത്രം' നടത്തിയ അന്വേഷണത്തില് വ്യക്തമാകുന്നത്.
വാണിജ്യ സിലിണ്ടറുകള്ക്ക് പുറമെ ഗാര്ഹിക സിലിണ്ടറുകളുടെ വിതരണവും താളം തെറ്റിയിരിക്കുകയാണ്. സാധാരണയായി ബുക്ക് ചെയ്ത് ദിവസങ്ങള്ക്കകം ലഭിച്ചിരുന്ന സിലിണ്ടറുകള്ക്കായി ഇപ്പോള് രണ്ടാഴ്ചയിലേറെ കാത്തിരിക്കേണ്ടി വരുന്നതായി വീട്ടമ്മമാര് പരാതിപ്പെടുന്നു.
പശ്ചിമേഷ്യന് സംഘര്ഷം നീണ്ടുപോവുകയാണെങ്കില് വരും ദിവസങ്ങളില് കേരളത്തിലെ ഹോട്ടല്-ഭക്ഷ്യ മേഖല വലിയ തകര്ച്ചയെ നേരിടേണ്ടി വരുമെന്നാണ് സൂചന.
റിപ്പോര്ട്ട്: ഇക്ബാല് പള്ളിമുക്ക്
Related News
