ടെഹ്റാന്: ഇറാനെതിരെ അമേരിക്കയും ഇസ്രായേലും നടത്തുന്ന സൈനിക കടന്നുകയറ്റങ്ങളെ ശക്തമായി അപലപിച്ച് ഹമാസ്. അധിനിവേശ ശക്തികള്ക്ക് ഉചിതമായ രീതിയില് മറുപടി നല്കാന് ഇറാന് എല്ലാ അവകാശവുമുണ്ടെന്ന് ടെഹ്റാനിലെ ഹമാസ് പ്രതിനിധി ഖാലിദ് ഖദ്ദൂമി വ്യക്തമാക്കി. ഇറാന്റെ ഔദ്യോഗിക വാര്ത്താ ഏജന്സിയായ തസ്നിമിന് നല്കിയ അഭിമുഖത്തിലാണ് അദ്ദേഹം നിലപാട് വ്യക്തമാക്കിയത്.
ഇറാനിലെ സിവിലിയന് കേന്ദ്രങ്ങള്ക്ക് നേരെ നടക്കുന്ന ആക്രമണങ്ങളെ ഖദ്ദൂമി രൂക്ഷമായി വിമര്ശിച്ചു. തെക്കന് ഇറാനിലെ മിനാബ് നഗരത്തിലുള്ള പെണ്കുട്ടികളുടെ സ്കൂളിന് നേരെയുണ്ടായ ആക്രമണം ശത്രുവിന്റെ ക്രൂരതയുടെയും അഹങ്കാരത്തിന്റെയും തെളിവാണെന്ന് അദ്ദേഹം പറഞ്ഞു.
നിലവിലെ സാഹചര്യത്തില് മുസ്ലിം രാജ്യങ്ങള്ക്കിടയില് ശക്തമായ ഐക്യം ഉണ്ടാകേണ്ടത് അനിവാര്യമാണെന്ന് ഹമാസ് പ്രതിനിധി ഓര്മ്മിപ്പിച്ചു. ഫലസ്തീന് ജനതയ്ക്കൊപ്പം നില്ക്കുന്നതിനാലാണ് ഇറാന് ഇന്ന് ശത്രുക്കളുടെ ലക്ഷ്യമാകുന്നത്. മാര്ച്ച് 13-ന് നടന്ന അന്താരാഷ്ട്ര ഖുദ്സ് ദിന റാലികള് ഇറാന്റെ ജനതയും നേതൃത്വവും തമ്മിലുള്ള ഐക്യം ലോകത്തിന് കാണിച്ചുകൊടുത്തു. യുദ്ധത്തില് നിഷ്പക്ഷത പാലിക്കാനുള്ള സമയമല്ലിതെന്നും ഇത് സത്യവും അസത്യവും തമ്മിലുള്ള പോരാട്ടമാണെന്നും ഖദ്ദൂമി കൂട്ടിച്ചേര്ത്തു.
Related News
