റിയാദ്- റിയാദ് ആസ്ഥാനമായി റിയാദ് യൂണിവേഴ്സിറ്റി ഓഫ് ആര്ട്സ് സ്ഥാപിക്കാന് തിരുഗേഹങ്ങളുടെ സേവകന് സല്മാന് രാജാവ് ഉത്തരവിട്ടു. സാംസ്കാരിക മന്ത്രാലയത്തിന് കീഴിലുള്ള സ്വതന്ത്ര വിദ്യാഭ്യാസ സ്ഥാപനമായി പ്രവര്ത്തിക്കുന്ന ഈ സര്വ്വകലാശാലക്ക് സ്വന്തമായി നിയമപരമായ വ്യക്തിത്വവും സാമ്പത്തിക-ഭരണപരമായ സ്വയംഭരണാധികാരവും ഉണ്ടായിരിക്കും. സൗദി വിഷന് 2030-ന്റെ ലക്ഷ്യങ്ങള്ക്കനുസൃതമായി സാംസ്കാരിക, കലാരംഗങ്ങളില് അന്താരാഷ്ട്ര നിലവാരത്തിലുള്ള ഉന്നത വിദ്യാഭ്യാസം നല്കുകയും സ്വദേശി പ്രതിഭകളെ വാര്ത്തെടുക്കുകയുമാണ് ഇതിലൂടെ ലക്ഷ്യമിടുന്നത്.
പുതിയ സര്വ്വകലാശാലയുടെ ട്രസ്റ്റി ബോര്ഡ് ഔദ്യോഗികമായി രൂപീകരിക്കുന്നത് വരെ അതിന്റെ അധികാരങ്ങള് വിനിയോഗിക്കാന് സാംസ്കാരിക മന്ത്രിയെ ചുമതലപ്പെടുത്തി. പ്രവര്ത്തനങ്ങള് വേഗത്തിലാക്കുന്നതിനും ആഗോളതലത്തിലുള്ള പ്രശസ്തമായ വിദ്യാഭ്യാസ സ്ഥാപനങ്ങളുമായി സഹകരിച്ച് മികച്ച പാഠ്യപദ്ധതികള് തയാറാക്കുന്നതിനും സര്വ്വകലാശാല മുന്ഗണന നല്കും. മേഖലയിലെ ഒരു സാംസ്കാരിക കേന്ദ്രമായി സൗദി അറേബ്യയെ മാറ്റിയെടുക്കാനുള്ള രാജ്യത്തിന്റെ താല്പര്യമാണ് ഈ നീക്കത്തിലൂടെ വ്യക്തമാകുന്നത്.
രാജകല്പ്പനയെ സ്വാഗതം ചെയ്ത സാംസ്കാരിക മന്ത്രിയും റിയാദ് യൂണിവേഴ്സിറ്റി ഓഫ് ആര്ട്സ് ബോര്ഡ് ചെയര്മാനുമായ പ്രിന്സ് ബദര് ബിന് അബ്ദുള്ള, സല്മാന് രാജാവിനും കിരീടാവകാശി മുഹമ്മദ് ബിന് സല്മാനും നന്ദി അറിയിച്ചു. സൗദി അറേബ്യയുടെ പ്രാദേശികവും ആഗോളവുമായ സാംസ്കാരിക പങ്ക് വര്ദ്ധിപ്പിക്കുന്നതിനും ക്രിയേറ്റീവ് ഇക്കണോമിയില് രാജ്യത്തെ മുന്നിരയിലെത്തിക്കുന്നതിനും ഈ തീരുമാനം വലിയ കരുത്താകുമെന്ന് അദ്ദേഹം പറഞ്ഞു.
നാഷണല് കള്ച്ചര് സ്ട്രാറ്റജിയുടെ ഭാഗമായുള്ള സുപ്രധാന പദ്ധതിയാണ് ഈ സര്വ്വകലാശാലയെന്ന് പ്രിന്സ് ബദര് വ്യക്തമാക്കി. സാംസ്കാരിക മേഖലയില് വര്ദ്ധിച്ചുവരുന്ന തൊഴില് ആവശ്യങ്ങള് നിറവേറ്റുന്നതിനായി വിദഗ്ധരായ സൗദി ഉദ്യോഗാര്ത്ഥികളെ പരിശീലിപ്പിക്കുക എന്നതാണ് ഇതിന്റെ പ്രധാന ലക്ഷ്യം. അത്യാധുനിക ഗവേഷണങ്ങളിലൂടെയും പ്രത്യേക അക്കാദമിക് പ്രോഗ്രാമുകളിലൂടെയും കലാരംഗത്ത് ആഗോള നേതൃത്വം വഹിക്കാനാണ് സര്വ്വകലാശാല വിഭാവനം ചെയ്യുന്നത്.
Related News
