റിയാദ്: ഈദുല് ഫിത്തറിന് മുന്നോടിയായുള്ള ശവ്വാല് മാസപ്പിറവി നിരീക്ഷിക്കാന് സൗദി അറേബ്യയിലെ മുസ്ലിം വിശ്വാസികളോട് സുപ്രീം കോടതി ആഹ്വാനം ചെയ്തു. 2026 മാര്ച്ച് 18 ബുധനാഴ്ച വൈകുന്നേരം (റമദാന് 29) മാസപ്പിറവി നിരീക്ഷിക്കാനാണ് ഔദ്യോഗിക അറിയിപ്പില് വ്യക്തമാക്കിയിരിക്കുന്നത്.
നഗ്നനേത്രങ്ങള് കൊണ്ടോ ബൈനോക്കുലര് വഴിയോ മാസപ്പിറവി ദര്ശിക്കുന്നവര് തൊട്ടടുത്തുള്ള കോടതിയില് വിവരം അറിയിക്കണമെന്നും സാക്ഷ്യം രേഖപ്പെടുത്തണമെന്നും കോടതി അഭ്യര്ത്ഥിച്ചു. മാസപ്പിറവി കാണുന്നവര്ക്ക് കോടതിയില് എത്താന് പ്രയാസമുണ്ടെങ്കില് അടുത്തുള്ള സര്ക്കാര് കേന്ദ്രങ്ങളുമായി ബന്ധപ്പെട്ട് ആവശ്യമായ സഹായം തേടാവുന്നതാണ്.
മാസപ്പിറവി നിരീക്ഷിക്കുന്നതിനായി വിവിധയിടങ്ങളില് രൂപീകരിച്ചിട്ടുള്ള സമിതികളില് താല്പ്പര്യമുള്ളവര് പങ്കുചേരണമെന്നും സുപ്രീം കോടതി നിര്ദ്ദേശിച്ചു. ശവ്വാല് മാസത്തിന്റെ ആരംഭം കൃത്യമായി നിര്ണ്ണയിക്കുന്നതിനും വിശ്വാസികള്ക്ക് ഉപകാരപ്രദമാകുന്ന രീതിയില് സഹകരിക്കുന്നതിനും ഇത്തരം പങ്കാളിത്തം അനിവാര്യമാണെന്നും കോടതി കൂട്ടിചേര്ത്തു.
Related News
