ടെഹ്റാന്: 2026-ലെ ലോകകപ്പ് ഫുട്ബോള് മത്സരങ്ങള് അമേരിക്കയില് നിന്ന് സഹആതിഥേയരായ മെക്സിക്കോയിലേക്ക് മാറ്റണമെന്ന് ഇറാന് ഫുട്ബോള് ഫെഡറേഷന് ഫിഫയോട് ആവശ്യപ്പെട്ടു. നിലവിലെ യുദ്ധസാഹചര്യത്തില് തങ്ങളുടെ കളിക്കാരുടെ സുരക്ഷ ഉറപ്പാക്കാന് കഴിയില്ലെന്ന ആശങ്കയെത്തുടര്ന്നാണ് ഈ നീക്കം. ഇറാനിയന് ഫുട്ബോള് പ്രസിഡന്റ് മെഹ്ദി താജ് ആണ് ഇക്കാര്യം അറിയിച്ചത്.
ഇറാന് ദേശീയ ടീമിന്റെ സുരക്ഷ ഉറപ്പാക്കാന് കഴിയില്ലെന്ന് അമേരിക്കന് പ്രസിഡന്റ് ഡൊണാള്ഡ് ട്രംപ് പരസ്യമായി പ്രസ്താവിച്ച സാഹചര്യത്തില് തങ്ങള് അമേരിക്കയിലേക്ക് യാത്ര ചെയ്യില്ലെന്ന് മെഹ്ദി താജ് വ്യക്തമാക്കി.
'ഇറാന് ടീമിന് സുരക്ഷ നല്കാന് കഴിയില്ലെന്ന് ട്രംപ് വ്യക്തമാക്കിയ സ്ഥിതിക്ക് ഞങ്ങള് അമേരിക്കയിലേക്ക് പോകില്ല. ഇറാന്റെ മത്സരങ്ങള് മെക്സിക്കോയില് നടത്തുന്നതിനെക്കുറിച്ച് ഞങ്ങള് ഫിഫയുമായി ചര്ച്ച നടത്തിവരികയാണ്,' - മെക്സിക്കോയിലെ ഇറാന് എംബസിയുടെ എക്സ് അക്കൗണ്ടിലൂടെ അദ്ദേഹം പറഞ്ഞു.
ഫെബ്രുവരി അവസാന വാരം അമേരിക്കയും ഇസ്രായേലും ഇറാനില് നടത്തിയ വ്യോമാക്രമണങ്ങളില് പരമോന്നത നേതാവും നിരവധി രാഷ്ട്രീയ-സൈനിക നേതാക്കളും കൊല്ലപ്പെട്ടിരുന്നു. ഇതിന് പിന്നാലെ, ഇറാന് ടീമിന് ലോകകപ്പില് പങ്കെടുക്കാന് കഴിയില്ലെന്ന് കായിക മന്ത്രി കഴിഞ്ഞ ആഴ്ച അറിയിച്ചിരുന്നു. എന്നാല്, ടീമിന് പങ്കെടുക്കാമെന്നും എന്നാല് ജീവനും സുരക്ഷയും പരിഗണിച്ച് അമേരിക്കയില് കളിക്കുന്നത് ഉചിതമാകില്ലെന്നുമാണ് ട്രംപിന്റെ നിലപാട്.
2025 മാര്ച്ച് 25-ന് ഏഷ്യയില് നിന്ന് ലോകകപ്പിന് യോഗ്യത നേടുന്ന ആദ്യ രാജ്യമായി ഇറാന് മാറിയിരുന്നു. ജൂണ് 11-ന് ആരംഭിക്കുന്ന 48 ടീമുകളുടെ ടൂര്ണമെന്റില് ലോസ് ഏഞ്ചല്സിലും സിയാറ്റിലിലുമായി മൂന്ന് ഗ്രൂപ്പ് മത്സരങ്ങളാണ് ഇറാന് നിശ്ചയിച്ചിരുന്നത്.
2026 ഫെബ്രുവരി 28-ന് ആരംഭിച്ച അമേരിക്ക-ഇസ്രായേല്-ഇറാന് യുദ്ധം ഇപ്പോള് മൂന്നാം വാരത്തിലേക്ക് കടന്നിരിക്കുകയാണ്. ഈ സംഘര്ഷം കായിക ലോകത്തെയും നിഴലിലാക്കിയിരിക്കുകയാണ്.
Related News
