മസ്‌കറ്റ്: ഒമാനിലെ റുസ്താഖ് വിലായത്തിലുണ്ടായ കെട്ടിട അപകടത്തില്‍ നാല് കുട്ടികള്‍ മരിച്ചു. കളിച്ചുകൊണ്ടിരുന്ന കുട്ടികളുടെ മേല്‍ പഴയ കെട്ടിടം തകര്‍ന്നു വീണാണ് അപകടം. സംഭവത്തില്‍ പരിക്കേറ്റ മൂന്ന് കുട്ടികളുടെ നില ഗുരുതരമായി തുടരുകയാണ്. അതിശക്തമായ മഴയാണ് കെട്ടിടം തകരാന്‍ കാരണമെന്ന് സംശയിക്കുന്നു.

റോയല്‍ ഒമാന്‍ പോലീസ് നല്‍കുന്ന വിവരമനുസരിച്ച്, അല്‍ ഹൈമ്ലി പ്രദേശത്താണ് ദാരുണമായ ഈ സംഭവം നടന്നത്. ഉപേക്ഷിക്കപ്പെട്ട നിലയിലുള്ള ഒരു പഴയ കെട്ടിടത്തിനുള്ളില്‍ ഏഴ് കുട്ടികള്‍ ചേര്‍ന്ന് കളിച്ചുകൊണ്ടിരിക്കുകയായിരുന്നു. ഇതിനിടെ കെട്ടിടം പെട്ടെന്ന് തകര്‍ന്നു വീഴുകയായിരുന്നു.

നാല് കുട്ടികള്‍ സംഭവസ്ഥലത്തുതന്നെ മരണപ്പെട്ടു. കെട്ടിടാവശിഷ്ടങ്ങള്‍ക്കിടയില്‍പ്പെട്ട മറ്റ് മൂന്ന് കുട്ടികളെ അതീവ ഗുരുതരാവസ്ഥയില്‍ ആശുപത്രിയില്‍ പ്രവേശിപ്പിച്ചു. ഇവര്‍ക്ക് വിദഗ്ധ ചികിത്സ നല്‍കിവരികയാണ്.

കെട്ടിടം തകരാനുണ്ടായ കാരണത്തെക്കുറിച്ചും അപകടത്തിന്റെ സാഹചര്യത്തെക്കുറിച്ചും ഒമാന്‍ അധികൃതര്‍ അന്വേഷണം ആരംഭിച്ചിട്ടുണ്ട്. മരിച്ച കുട്ടികളെക്കുറിച്ചുള്ള കൂടുതല്‍ വിവരങ്ങള്‍ അധികൃതര്‍ പുറത്തുവിട്ടിട്ടില്ല.

ഒമാനില്‍ മഴക്കെടുതിയില്‍ മരിച്ചവരുടെ എണ്ണം ഇതോടെ എട്ടായി ഉയര്‍ന്നു. ബര്‍കയില്‍ രണ്ടു മലയാളി കുടുംബങ്ങള്‍ സഞ്ചരിച്ച കാര്‍ വാദിയില്‍ കുത്തൊഴുക്കില്‍ പെട്ട് രണ്ടു പേരും മബേലയില്‍ കാറുകള്‍ വാദിയില്‍ പെട്ട് രണ്ടു പേരും മരണപ്പെട്ടിരുന്നു.