ജിദ്ദ: മക്ക പ്രവിശ്യയുടെ വിവിധ ഭാഗങ്ങളില് ചൊവ്വ, ബുധന് (മാര്ച്ച് 24, 25) ദിവസങ്ങളില് മിതമായതോ ശക്തമായതോ ആയ മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. ജിദ്ദ, ഖുലൈസ്, ബഹ്റ, റാബിഗ് എന്നീ പ്രദേശങ്ങളിലാണ് പ്രധാനമായും മഴ പ്രവചിക്കപ്പെട്ടിരിക്കുന്നത്.
കാലാവസ്ഥാ വ്യതിയാനത്തിന്റെ പശ്ചാത്തലത്തില് പൊതുജനങ്ങള് അതീവ ജാഗ്രത പാലിക്കണമെന്ന് സിവില് ഡിഫന്സ് ഡയറക്ടറേറ്റ് അറിയിച്ചു. ഔദ്യോഗിക നിര്ദ്ദേശങ്ങള് കര്ശനമായി പാലിക്കണമെന്നും സുരക്ഷാ മുന്കരുതലുകള് സ്വീകരിക്കണമെന്നും അധികൃതര് അഭ്യര്ത്ഥിച്ചു. മഴയുടെ പശ്ചാത്തലത്തില് താഴ്ന്ന പ്രദേശങ്ങളില് വെള്ളക്കെട്ട് രൂപപ്പെടാന് സാധ്യതയുള്ളതിനാല് വാഹനയാത്രക്കാരും താമസക്കാരും ജാഗ്രത പുലര്ത്തണം.
എല്ലാവരുടെയും സുരക്ഷ മുന്നിര്ത്തിയുള്ള പ്രവര്ത്തനങ്ങളില് സിവില് ഡിഫന്സുമായി സഹകരിക്കണമെന്ന് അധികൃതര് ഓര്മ്മിപ്പിച്ചു. ഈ മഴ നാടിനും ജനങ്ങള്ക്കും അനുഗ്രഹീതവും ഗുണകരവുമാകട്ടെ എന്ന് പ്രാര്ത്ഥിക്കുന്നതായും കാലാവസ്ഥാ കേന്ദ്രം വാര്ത്താക്കുറിപ്പില് അറിയിച്ചു.
Related News
