ജിദ്ദ: കേരള നിയമസഭയിലേക്ക് നടക്കാനിരിക്കുന്ന പൊതുതെരഞ്ഞെടുപ്പില് യുഡിഎഫിന്റെ ചരിത്ര വിജയം ഉറപ്പാക്കുന്നതിനായി ജിദ്ദയില് വിപുലമായ പ്രചാരണ പ്രവര്ത്തനങ്ങള്ക്ക് തുടക്കമായി. ജിദ്ദ കെഎംസിസി സെന്ട്രല് കമ്മിറ്റി പ്രസിഡന്റ് സി.കെ.എ. റസാഖ് മാസ്റ്ററുടെ അധ്യക്ഷതയില് ചേര്ന്ന തെരഞ്ഞെടുപ്പ് കണ്വെന്ഷന് വേള്ഡ് കെഎംസിസി പ്രസിഡന്റ് കെ.പി. മുഹമ്മദ് കുട്ടി ഉദ്ഘാടനം ചെയ്തു.
ജിദ്ദ കെഎംസിസിയുടെ വിവിധ മേഖലകളില് നിന്നുള്ള നേതാക്കളുടെയും പ്രവര്ത്തകരുടെയും വന് പങ്കാളിത്തത്തോടെ നടന്ന യോഗം കേരളത്തിലെ നിലവിലെ രാഷ്ട്രീയ സാഹചര്യങ്ങളും തെരഞ്ഞെടുപ്പില് ചര്ച്ചയാകേണ്ട പ്രധാന വിഷയങ്ങളും വിശദമായി വിലയിരുത്തി.
സംസ്ഥാനത്തിന്റെ സമഗ്ര വികസനത്തിനും പ്രവാസി സമൂഹം നേരിടുന്ന വിവിധ പ്രശ്നങ്ങള്ക്ക് ശാശ്വത പരിഹാരം കാണുന്നതിനും ഐക്യജനാധിപത്യ മുന്നണി അധികാരത്തില് വരേണ്ടത് അനിവാര്യമാണെന്ന് ഗ്ലോബല് കെഎംസിസി പ്രസിഡന്റ് കെ.പി. മുഹമ്മദ് കുട്ടി അഭിപ്രായപ്പെട്ടു. കഴിഞ്ഞ പത്തു വര്ഷമായി കേരളത്തിലെ ജനജീവിതം ദുസ്സഹമാണെന്നും സംസ്ഥാനം കടുത്ത കടബാധ്യതയിലാണെന്നും അദ്ദേഹം പറഞ്ഞു. ഭരണരംഗത്തെ അഴിമതിയും സ്വജനപക്ഷപാതവും പിന്വാതില് നിയമനങ്ങളും സര്ക്കാരിന്റെ വിശ്വാസ്യത തകര്ത്തതായും അദ്ദേഹം കുറ്റപ്പെടുത്തി.
അവസരവാദ രാഷ്ട്രീയത്തിന്റെ ഭാഗമായി വര്ഗീയ ശക്തികളെ പ്രോത്സാഹിപ്പിക്കുന്ന നിലപാടാണ് സര്ക്കാര് സ്വീകരിക്കുന്നത്. ഇത് കേരളത്തിന്റെ മതസൗഹൃദ അന്തരീക്ഷത്തെ തകര്ക്കുന്നു. ജനങ്ങളുടെ പ്രതീക്ഷകള് നിറവേറ്റാന് കഴിയാത്ത ഈ സര്ക്കാരിന് പകരം ഒരു ഭരണമാറ്റം അനിവാര്യമാണെന്ന് ചര്ച്ചയില് പങ്കെടുത്ത മറ്റ് നേതാക്കളും അഭിപ്രായപ്പെട്ടു.
നാസര് വെളിയങ്കോട്, നസീര് വാവക്കുഞ്ഞ്, ഇസ്മായില് മുണ്ടക്കുളം, എ.കെ. ബാവ, നാസര് മച്ചിങ്ങല്, മുഹമ്മദ് കുട്ടി പാണ്ടിക്കാട്, നാണി ഇസഹാക്ക്, സക്കരിയ ആറളം, നസീര് പെരുമ്പല കാസര്കോട്, സെയ്തലവി രാമനാട്ടുകര, മുഹമ്മദ് കെ.കെ, മനാഫ് മണ്ണാര്ക്കാട്, കെ.എസ്. റസാഖ് കോട്ടയം, സമീര് ആലപ്പുഴ, നൗഫല് ഉള്ളാടന്, മുഹമ്മദ് പെരുമ്പിലായി, ശിഹാബ് കണ്ണമംഗലം, മുഹമ്മദലി മുസ്ലിയാര് പെരിന്തല്മണ്ണ, അബൂട്ടി നിലമ്പൂര്, ജാഫര് വെന്നിയൂര്, അയ്യൂബ് മറയൂര്, ബക്കര് കിഴിശ്ശേരി, സലാഹു വാളക്കുട, സമീര് തൃക്കലങ്ങോട്, അബ്ദുല് ഖാദര് ചെങ്കള തുടങ്ങിയവര് സംസാരിച്ചു.
കേരളത്തിലെ അനുകൂല സാഹചര്യം പ്രയോജനപ്പെടുത്തി പ്രവാസി സമൂഹം പ്രചാരണ രംഗത്ത് സജീവമാകണമെന്ന് യോഗം ആഹ്വാനം ചെയ്തു. തെരഞ്ഞെടുപ്പ് പ്രചാരണ പ്രവര്ത്തനങ്ങള്ക്ക് ഇസ്ഹാഖ് പൂണ്ടോളി, ടി.പി. സിറാജ് കണ്ണവം, അലി പാങ്ങാട്ട്, സീതി കൊളക്കാടന്, ആബിദ് പട്ടാമ്പി, മുസ്തഫ ആനക്കയം എന്നിവര് നേതൃത്വം നല്കി. വി.പി. മുസ്തഫ സ്വാഗതവും ജലാല് തേഞ്ഞിപ്പലം നന്ദിയും പറഞ്ഞു.
