ബീജിംഗ്: അഞ്ചാം വാരത്തിലേക്ക് കടന്ന മിഡില് ഈസ്റ്റ് സംഘര്ഷം ലഘൂകരിക്കാനും അമേരിക്കയും ഇറാനും തമ്മില് ചര്ച്ചകള്ക്ക് കളമൊരുക്കാനും ലക്ഷ്യമിട്ട് ചൈനയും പാകിസ്താനും സംയുക്ത സമാധാന പദ്ധതി പ്രഖ്യാപിച്ചു. ചൈനീസ് വിദേശകാര്യ മന്ത്രി വാങ് യിയും പാകിസ്താന് വിദേശകാര്യ മന്ത്രി ഇഷാഖ് ദാറും ബീജിംഗില് നടത്തിയ കൂടിക്കാഴ്ചയിലാണ് നിര്ണ്ണായകമായ 'അഞ്ചിന സമാധാന പദ്ധതി' രൂപീകരിച്ചത്.
അഞ്ചിന സമാധാന പദ്ധതിയിലെ പ്രധാന നിര്ദ്ദേശങ്ങള്: സൈനിക നടപടികള് ഉടനടി അവസാനിപ്പിക്കുക. സമാധാന ചര്ച്ചകള് എത്രയും വേഗം ആരംഭിക്കുക. സൈനികേതര ലക്ഷ്യങ്ങളുടെ (സിവില് ഇന്ഫ്രാസ്ട്രക്ചര്) സുരക്ഷ ഉറപ്പാക്കുക. കപ്പല് ഗതാഗത പാതകളുടെ സുരക്ഷയും സമുദ്രത്തിലൂടെയുള്ള ചരക്ക് നീക്കവും പുനഃസ്ഥാപിക്കുക. ഐക്യരാഷ്ട്രസഭയുടെ ചാര്ട്ടറിന് മുന്ഗണന നല്കുക.
മിഡില് ഈസ്റ്റിലെ നിലവിലെ സാഹചര്യം അതീവ ഗുരുതരമാണെന്നും ഇത് ഒരു കക്ഷിയുടെയും താത്പര്യങ്ങള്ക്ക് നിരക്കുന്നതല്ലെന്നും ചൈനീസ് വിദേശകാര്യ മന്ത്രാലയ വക്താവ് മാവോ നിംഗ് പറഞ്ഞു. ഇറാനുമായി ദീര്ഘകാല ബന്ധമുള്ള പാകിസ്താന് ഈ ചര്ച്ചകളില് പ്രധാന മധ്യസ്ഥനായാണ് പ്രവര്ത്തിക്കുന്നത്. ഇറാന്, ഗള്ഫ് രാജ്യങ്ങള് എന്നിവയുടെ പരമാധികാരവും പ്രാദേശിക അഖണ്ഡതയും സംരക്ഷിക്കപ്പെടണമെന്ന് ഇരുരാജ്യങ്ങളും സംയുക്ത പ്രസ്താവനയില് ആവശ്യപ്പെട്ടു.
ഫെബ്രുവരി 28-ന് ഇറാനെതിരെ ഇസ്രായേലും അമേരിക്കയും ആരംഭിച്ച സംയുക്ത ആക്രമണത്തെത്തുടര്ന്നാണ് മേഖലയില് സംഘര്ഷം രൂക്ഷമായത്. ഇറാന് പരമോന്നത നേതാവായിരുന്ന ആയത്തുള്ള അലി ഖാംനഇ ഉള്പ്പെടെ 1,340-ലധികം പേര് ഈ യുദ്ധത്തില് കൊല്ലപ്പെട്ടു. ഇതിന് തിരിച്ചടിയായി ഇസ്രായേല്, ജോര്ദാന്, ഇറാഖ്, ഗള്ഫ് രാജ്യങ്ങള് എന്നിവടങ്ങളിലെ അമേരിക്കന് സൈനിക കേന്ദ്രങ്ങള്ക്ക് നേരെ ഇറാന് ഡ്രോണ്, മിസൈല് ആക്രമണങ്ങള് നടത്തിയിരുന്നു.
ബ്രിട്ടീഷ് പ്രധാനമന്ത്രി കീര് സ്റ്റാമര് ഈ യുദ്ധത്തില് നിന്ന് വിട്ടുനില്ക്കുമെന്ന് പ്രഖ്യാപിച്ചതും, നാറ്റോ സഖ്യത്തില് നിന്ന് പുറത്തുപോകുന്നത് പരിഗണനയിലാണെന്ന ഡൊണാള്ഡ് ട്രംപിന്റെ പ്രസ്താവനയും ആഗോളതലത്തില് വലിയ ചര്ച്ചകള്ക്ക് വഴിവെച്ചിട്ടുണ്ട്. മേഖലയിലെ വെടിനിര്ത്തലിനായി പാകിസ്താന് വഴി അമേരിക്കയുമായി പരോക്ഷ ചര്ച്ചകള്ക്ക് ശ്രമം തുടരുകയാണ്.
Related News
