മിന: 1447-ാമത് ഹിജ്റ വര്ഷത്തെ ഹജ്ജ് സീസണ് വന് വിജയകരമായി പൂര്ത്തിയായതായി മക്ക ഡെപ്യൂട്ടി ഗവര്ണറും ഹജ്ജ്-ഉംറ സ്ഥിരം സമിതി വൈസ് ചെയര്മാനുമായ സൗദ് ബിന് മിഷാല് രാജകുമാരന് പ്രഖ്യാപിച്ചു. ടെലിവിഷന് സന്ദേശത്തിലൂടെയാണ് അദ്ദേഹം ഇക്കാര്യം അറിയിച്ചത്. 'മികച്ച സുരക്ഷയും ആസൂത്രിതമായ പ്രവര്ത്തനങ്ങളും, തീര്ത്ഥാടകര്ക്ക് ആവശ്യമായ സേവനങ്ങളുടെയും പിന്തുണയുടെയും സമ്പൂര്ണ്ണ ലഭ്യതയും ഉറപ്പുവരുത്തിക്കൊണ്ടാണ് ഇത്തവണത്തെ ഹജ്ജ് വിജയകരമായി പൂര്ത്തിയായതെന്ന് പ്രഖ്യാപിക്കുന്നതില് എനിക്ക് ഏറെ സന്തോഷമുണ്ട്,' സൗദ് രാജകുമാരന് പറഞ്ഞു.
വിശുദ്ധ നഗരങ്ങള് ക്രമീകരണത്തിന്റെയും ഐക്യത്തിന്റെയും മാതൃകയായി മാറുന്നതുവരെ, ഉറങ്ങാത്ത ഒരു രാജ്യത്തിന്റെ പ്രതിജ്ഞാബദ്ധതയും സേവനസന്നദ്ധരായ മനസ്സുകളും വിശ്രമമില്ലാതെ പ്രവര്ത്തിച്ച കൈകളുമാണ് ഈ വിജയത്തിന് പിന്നിലെന്ന് അദ്ദേഹം കൂട്ടിച്ചേര്ത്തു. കൊടുത്ത വാക്ക് പാലിക്കുകയും ചെയ്യുന്ന ജോലിയില് മികവ് പുലര്ത്തുകയും ആത്മാര്ത്ഥതയോടെ സേവനം ചെയ്യുകയും ചെയ്യുന്ന ഒരു രാജ്യത്തിന്റെ കഥയാണ് ഈ വര്ഷത്തെ ഹജ്ജ് എന്ന് അദ്ദേഹം വിശേഷിപ്പിച്ചു.
തീര്ത്ഥാടകര്ക്ക് ഈ വിശുദ്ധ ഭൂമിയുടെ പവിത്രതയ്ക്കും സന്ദര്ഭത്തിന്റെ പ്രാധാന്യത്തിനും അനുയോജ്യമായ പരിചരണം ലഭിച്ചുവെന്നും, അതുകൊണ്ടുതന്നെ പൂര്ണ്ണമായ സുരക്ഷിതത്വത്തിലും സമാധാനത്തിലും എളുപ്പത്തിലും അവര്ക്ക് ഹജ്ജ് കര്മ്മങ്ങള് നിര്വഹിക്കാന് സാധിച്ചുവെന്നും അദ്ദേഹം ചൂണ്ടിക്കാട്ടി. തീര്ത്ഥാടകരെ സേവിക്കുന്നത് ഒരു ബഹുമതിയായി കാണുകയും മാനുഷിക പരിഗണനയ്ക്ക് മുന്ഗണന നല്കുകയും ചെയ്യുന്ന ഭരണനേതൃത്വത്തിന്റെ നിരന്തരമായ പിന്തുണയുടെ ഫലമാണ് ഈ വിജയമെന്നും സൗദ് രാജകുമാരന് വ്യക്തമാക്കി.
ഹജ്ജ് വിജയകരമായി പൂര്ത്തിയായി എന്നത് ഒരു യാത്രയുടെ അവസാനമല്ല, മറിച്ച് പുതുക്കപ്പെട്ട ഉത്തരവാദിത്തത്തിന്റെ തുടക്കമാണെന്ന് ഡെപ്യൂട്ടി ഗവര്ണര് പറഞ്ഞു. 'ഈ വിജയം യാത്രയുടെ അവസാനമല്ല, മറിച്ച് ഓരോ വര്ഷവും പുതുക്കപ്പെടുന്ന ഒരു പുതിയ ഉത്തരവാദിത്തവും പ്രതിജ്ഞയുമാണ്. ഈ രാജ്യം എന്നും സുരക്ഷയുടെയും ഔദാര്യത്തിന്റെയും വിളക്കുമാടമായും, സേവനത്തിന്റെയും വിശ്വസ്തതയുടെയും കേന്ദ്രമായും നിലകൊള്ളും,' അദ്ദേഹം കൂട്ടിച്ചേര്ത്തു.
