കോഴിക്കോട്: മൂഴിക്കല്‍ ഉറക്കമുണര്‍ന്നത് നാടിനെ നടുക്കിയ ഇരട്ട മരണവാര്‍ത്ത കേട്ടുകൊണ്ടാണഅ. 16 വയസ്സുകാരിയെ വീട്ടില്‍ അതിക്രമിച്ചു കയറി ശ്വാസംമുട്ടിച്ച് കൊലപ്പെടുത്തിയ ശേഷം ബന്ധുവായ യുവാവ് ജീവനൊടുക്കുകയായിരുന്നു. പതിനാറുകാരിയുടെ അമ്മയുടെ സഹോദരി പുത്രനായ അദ്നാന്‍ (20) ആണ് പെണ്‍കുട്ടിയെ കൊലപ്പെടുത്തിയ ശേഷം അതേ വീട്ടിലെ മറ്റൊരു മുറിയില്‍ തൂങ്ങിമരിച്ചത്. ഇന്ന് പുലര്‍ച്ചെ അഞ്ചു മണിയോടെയായിരുന്നു ദാരുണമായ സംഭവം.

കൊലപാതകം മുന്‍കൂട്ടി നിശ്ചയിച്ചുറപ്പിച്ചതാണെന്ന സംശയത്തിലാണ് പൊലീസ്. വീടിനുള്ളിലെ സിസിടിവി ക്യാമറകള്‍ ഓഫ് ചെയ്ത നിലയിലാണ് കണ്ടെത്തിയത്. വീട്ടുകാര്‍ അറിയാതെ കള്ളത്താക്കോല്‍ ഉപയോഗിച്ചാണ് അദ്നാന്‍ അകത്തു കയറിയതെന്നാണ് പ്രാഥമിക നിഗമനം. പെണ്‍കുട്ടിയുടെ കഴുത്തില്‍ ഷാള്‍ മുറുക്കിയാണ് കൊലപാതകം നടത്തിയത്.

സ്വഭാവദൂഷ്യത്തെ തുടര്‍ന്ന് അദ്നാനെ നേരത്തെ ഈ വീട്ടില്‍ നിന്ന് പുറത്താക്കിയിരുന്നതായി പൊലീസ് പറയുന്നു. അദ്നാന്റെ മോശം പെരുമാറ്റം പെണ്‍കുട്ടി തിരിച്ചറിഞ്ഞതും ഇതിനെ ചോദ്യം ചെയ്തതുമാകാം പ്രകോപനത്തിന് കാരണമെന്നാണ് സൂചന. നേരത്തെയും ഇയാള്‍ പെണ്‍കുട്ടിയുടെ വീട്ടില്‍ പ്രശ്‌നങ്ങളുണ്ടാക്കിയിരുന്നതായി വിവരമുണ്ട്.

സംഭവസ്ഥലത്തെത്തിയ പൊലീസ് ഇന്‍ക്വസ്റ്റ് നടപടികള്‍ പൂര്‍ത്തിയാക്കി മൃതദേഹങ്ങള്‍ പോസ്റ്റ്മോര്‍ട്ടത്തിനായി കോഴിക്കോട് മെഡിക്കല്‍ കോളേജ് ആശുപത്രിയിലേക്ക് മാറ്റി.