മക്ക: ഹജ്ജ് സര്‍വീസുകളുടെയും മശാഇറുകളിലേക്കുള്ള (പുണ്യസ്ഥലങ്ങള്‍) പ്രവേശന അനുമതി പത്രത്തിന്റെയും പേരില്‍ സോഷ്യല്‍ മീഡിയ വഴി വ്യാജ പരസ്യം നല്‍കി തട്ടിപ്പ് നടത്തിയ വിദേശിയെ മക്ക പോലീസ് അറസ്റ്റ് ചെയ്തു. ഈജിപ്ഷ്യന്‍ പൗരനാണ് പിടിയിലായത്. ഇയാളെ പ്രാഥമിക നടപടികള്‍ പൂര്‍ത്തിയാക്കി പബ്ലിക് പ്രോസിക്യൂഷന് കൈമാറി.

ഹജ്ജ് സംബന്ധമായ ഔദ്യോഗിക നിയമങ്ങളും മാര്‍ഗ്ഗനിര്‍ദ്ദേശങ്ങളും കൃത്യമായി പാലിക്കണമെന്ന് പൊതു സുരക്ഷാ ഡയറക്ടറേറ്റ് സ്വദേശികളോടും പ്രവാസികളോടും ആവശ്യപ്പെട്ടു. നിയമലംഘനങ്ങളെക്കുറിച്ച് ശ്രദ്ധയില്‍പ്പെട്ടാല്‍ മക്ക, റിയാദ്, മദീന, കിഴക്കന്‍ പ്രവിശ്യ എന്നിവിടങ്ങളിലുള്ളവര്‍ 911 എന്ന നമ്പറിലും, രാജ്യത്തിന്റെ മറ്റ് ഭാഗങ്ങളിലുള്ളവര്‍ 999 എന്ന നമ്പറിലും വിളിച്ച് അറിയിക്കണമെന്നും അധികൃതര്‍ അഭ്യര്‍ത്ഥിച്ചു.