മക്ക: വിശുദ്ധ കഅബയുടെയും ഹിജ്ര്‍ ഇസ്മായിലിന്റെയും വാര്‍ഷിക അറ്റകുറ്റപ്പണികള്‍ വിജയകരമായി പൂര്‍ത്തിയാക്കിയതായി ഇരുഹറം കാര്യാലയ ജനറല്‍ അതോറിറ്റി അറിയിച്ചു. അത്യാധുനിക എഞ്ചിനീയറിംഗ് സാങ്കേതിക നിലവാരത്തില്‍, തീര്‍ത്ഥാടകരുടെ തിരക്കിന് തടസ്സമില്ലാത്ത വിധത്തിലാണ് പ്രവൃത്തികള്‍ പൂര്‍ത്തിയാക്കിയത്.

ആകെ 4,700 മനുഷ്യ മണിക്കൂറുകള്‍ (ങമിവീൗൃ)െ ചെലവഴിച്ചാണ് ഈ ബൃഹദ് പദ്ധതി പൂര്‍ത്തിയാക്കിയത്. 31 പ്രധാന പാക്കേജുകളിലായി 305 പ്രവര്‍ത്തനങ്ങള്‍ ഉള്‍പ്പെടുത്തിയായിരുന്നു അറ്റകുറ്റപ്പണികള്‍. കഅബയുടെ ഉള്‍ഭാഗം, മേല്‍ക്കൂര, പരിസരം എന്നിവിടങ്ങളില്‍ വിശദമായ പരിശോധനകളും നടത്തി.

കഅബയ്ക്ക് ചുറ്റുമുള്ള 30 മീറ്ററിലധികം എക്‌സ്പാന്‍ഷന്‍ ജോയിന്റുകള്‍ (സിലിക്കണ്‍) മാറ്റിസ്ഥാപിച്ചു. 50 മീറ്ററിലധികം മാര്‍ബിള്‍ ജോയിന്റുകള്‍ റീ-ഗ്രൗട്ടിംഗ് നടത്തുകയും കഅബയ്ക്ക് ചുറ്റുമുള്ള മാര്‍ബിള്‍ തറകള്‍ പോളിഷ് ചെയ്ത് വൃത്തിയാക്കുകയും ചെയ്തു.

അന്താരാഷ്ട്ര നിലവാരത്തിലുള്ള സാങ്കേതികവിദ്യകളും വസ്തുക്കളും ഉപയോഗിച്ച് സൗദിയില്‍ നിന്നുള്ള വിദഗ്ധ തൊഴിലാളികളാണ് ഈ പദ്ധതി നടപ്പിലാക്കിയത്. കഅബയുടെ ഘടനയുടെ ഈടുനില്‍പ്പിനും കാര്യക്ഷമത വര്‍ദ്ധിപ്പിക്കാനുമാണ് അതോറിറ്റി ഇതിലൂടെ ലക്ഷ്യമിടുന്നത്. തീര്‍ത്ഥാടകരുടെ ആരാധനാ കര്‍മ്മങ്ങള്‍ക്കൊന്നും തടസ്സമില്ലാത്ത വിധത്തില്‍ വളരെ കൃത്യമായ പ്ലാനിംഗിലൂടെയാണ് പ്രവൃത്തികള്‍ നടന്നതെന്ന് അധികൃതര്‍ വ്യക്തമാക്കി.