ബുറൈദ: അപൂര്വ്വ രക്തഗ്രൂപ്പുകളുള്ളവര്ക്കായി ഭവനങ്ങളില് ചെന്ന് രക്തം സ്വീകരിക്കുന്ന പുതിയ പദ്ധതിയുമായി ഖസീമിലെ സെന്ട്രല് ബ്ലഡ് ബാങ്ക് രംഗത്ത്. 'ബ്ലഡ് ബാങ്ക്സ് ഫ്രണ്ട്സ് ചാരിറ്റി'യുമായി സഹകരിച്ചാണ് അപൂര്വ്വ രക്തദാതാക്കള്ക്കായി ഈ ഹോം ബ്ലഡ് ഡൊണേഷന് സര്വീസ് ആരംഭിച്ചിരിക്കുന്നത്.
ഏറ്റവും ഉയര്ന്ന ഗുണനിലവാരവും സുരക്ഷാ മാനദണ്ഡങ്ങളും പാലിച്ച് പ്രവര്ത്തിക്കുന്ന വിദഗ്ധരായ മെഡിക്കല് സംഘത്തിന്റെ സഹായത്തോടെ ദാതാക്കള്ക്ക് വീടുകളില് നിന്ന് തന്നെ രക്തദാനം നടത്താന് ഈ സേവനം അവസരമൊരുക്കുന്നു. അത്യാഹിത ഘട്ടങ്ങളിലെ പ്രതികരണ സമയം മെച്ചപ്പെടുത്താനും, അടിയന്തര സാഹചര്യങ്ങളെ നേരിടാനുള്ള സജ്ജീകരണം വര്ദ്ധിപ്പിക്കാനും, അപൂര്വ്വ രക്ത യൂണിറ്റുകളുടെ തന്ത്രപരമായ ശേഖരം ശക്തിപ്പെടുത്താനും ഈ പദ്ധതി സഹായിക്കുമെന്നാണ് വിലയിരുത്തപ്പെടുന്നത്.
രക്തദാനത്തെക്കുറിച്ചുള്ള അവബോധം വളര്ത്തുന്നതിനും പതിവായി രക്തം നല്കാന് ജനങ്ങളെ പ്രോത്സാഹിപ്പിക്കുന്നതിനുമായി കഴിഞ്ഞ മാസം രാജ്യത്തുടനീളമുള്ള കേന്ദ്രങ്ങളില് ചാരിറ്റിയുടെ നേതൃത്വത്തില് ലോക രക്തദാതാക്കളുടെ ദിനാചരണം സംഘടിപ്പിച്ചിരുന്നു. എല്ലാ വര്ഷവും ജൂണ് 14-ന് ആഗോളതലത്തില് ആചരിക്കുന്ന ലോക രക്തദാതാക്കളുടെ ദിനത്തോടനുബന്ധിച്ച് രക്തദാന ക്യാമ്പുകള്, സൗജന്യ ആരോഗ്യ പരിശോധനകള്, ബോധവല്ക്കരണ സ്റ്റാളുകള് എന്നിവയും ഒരുക്കിയിരുന്നു.
ഓരോ രക്തദാനവും വിലപ്പെട്ട ജീവനുകള് രക്ഷിക്കാന് സഹായിക്കുമെന്ന് ചാരിറ്റി ഓര്മ്മിപ്പിച്ചു. ഈ മാനുഷിക ദൗത്യത്തില് മുഴുവന് ജനങ്ങളും പങ്കാളികളാകണമെന്നും അവര് അഭ്യര്ഥിച്ചു.
Related News
