ന്യൂദല്ഹി- മുന് കരസേനാ മേധാവി ജനറല് എം.എം. നരവണെയുടെ ആത്മകഥയായ 'ഫോര് സ്റ്റാര്സ് ഓഫ് ഡെസ്റ്റിനി' പാര്ലമെന്റിലും രാഷ്ട്രീയ വൃത്തങ്ങളിലും വലിയ ചര്ച്ചയായിരുന്നു. ചൈനയുമായുള്ള അതിര്ത്തി തര്ക്കവേളയില് പ്രതിരോധ മന്ത്രി രാജ്നാഥ് സിംഗ് തനിക്ക് നല്കിയ നിര്ദ്ദേശം തെറ്റായി വ്യാഖ്യാനിക്കപ്പെട്ട പശ്ചാത്തലത്തില്, ഒരു പ്രമുഖ മാധ്യമത്തിന് നല്കിയ അഭിമുഖത്തില് അദ്ദേഹം തന്റെ നിലപാട് വ്യക്തമാക്കി. 'ജോ ഉചിത് സംഝോ, വോ കരോ' (അനുയോജ്യമെന്ന് തോന്നുന്നത് ചെയ്യുക) എന്ന മന്ത്രിയുടെ വാക്കുകള് സര്ക്കാരിന് സൈന്യത്തിലുള്ള വിശ്വാസത്തെയാണ് സൂചിപ്പിക്കുന്നതെന്ന് അദ്ദേഹം പറഞ്ഞു.
ഭാരതീയ സൈന്യത്തിന് സ്വതന്ത്രമായി തീരുമാനങ്ങള് എടുക്കാനുള്ള പൂര്ണ്ണ അധികാരം സര്ക്കാര് നല്കിയിരുന്നുവെന്ന് നരവണെ അടിവരയിട്ടു പറഞ്ഞു. ഈ വാക്കുകള് സൈന്യത്തിന്റെ വിവേകത്തിലും നേതൃത്വത്തിലും സര്ക്കാരിനുള്ള വലിയ ആത്മവിശ്വാസമാണ് പ്രകടമാക്കുന്നത്. എല്ലാ ഘടകങ്ങളും പരിശോധിച്ച ശേഷം സൈന്യം ഉചിതമായ തീരുമാനമെടുക്കുമെന്ന് സര്ക്കാരിന് ഉറപ്പുണ്ടായിരുന്നുവെന്നും, ഇതിനെ രാഷ്ട്രീയവല്ക്കരിക്കരുതെന്നും അദ്ദേഹം കൂട്ടിച്ചേര്ത്തു.
പാര്ലമെന്റിന്റെ ബജറ്റ് സമ്മേളനത്തിനിടെ രാഹുല് ഗാന്ധി ഈ പുസ്തകത്തിലെ പരാമര്ശങ്ങള് ഉദ്ധരിച്ചതോടെയാണ് വിവാദം പുകഞ്ഞത്. ചൈനീസ് ടാങ്കുകള് അതിര്ത്തിയില് എത്തിയപ്പോള് പ്രധാനമന്ത്രിയുടെ ഭാഗത്തുനിന്ന് കൃത്യമായ നിര്ദ്ദേശങ്ങള് ലഭിച്ചില്ലെന്നും, സൈനിക മേധാവി ഒറ്റപ്പെട്ടതായും രാഹുല് ഗാന്ധി ആരോപിച്ചിരുന്നു. എന്നാല് സൈന്യം രാഷ്ട്രീയത്തിന് അതീതമാണെന്നും അയല്രാജ്യങ്ങളിലെപ്പോലെ (പാകിസ്ഥാന്) സൈന്യം രാഷ്ട്രീയത്തില് ഇടപെടാറില്ലെന്നും നരവണെ ഓര്മ്മിപ്പിച്ചു.
2020 ഓഗസ്റ്റ് 31-ന് ചൈനീസ് സൈന്യം റെച്ചിന് ലാ ലക്ഷ്യമാക്കി നീങ്ങിയപ്പോഴായിരുന്നു ഈ നിര്ദ്ദേശം ലഭിച്ചത്. പുസ്തകത്തിന്റെ പ്രസിദ്ധീകരണം നിലവില് പ്രതിരോധ മന്ത്രാലയത്തിന്റെ അനുമതിക്കായി കാത്തിരിക്കുകയാണ്. തന്റെ പുസ്തകം വ്യക്തിപരമായ അനുഭവങ്ങളെ അടിസ്ഥാനമാക്കിയുള്ളതാണെന്നും രഹസ്യരേഖകള് ഒന്നും തന്നെ ഇതിനായി ഉപയോഗിച്ചിട്ടില്ലെന്നും മുന് കരസേനാ മേധാവി വ്യക്തമാക്കി.
അതിര്ത്തിയിലെ സംഘര്ഷങ്ങളില് ഇന്ത്യയ്ക്ക് തന്നെയായിരുന്നു മേല്ക്കൈ ഉണ്ടായിരുന്നതെന്ന് നരവണെ അഭിമുഖത്തില് പറഞ്ഞു. ചൈന തങ്ങളുടെ കോട്ടകള് തകര്ത്ത് പിന്നോട്ട് പോയത് ലോകം കണ്ടതാണ്. പ്രതിപക്ഷം ആരോപിക്കുന്നത് പോലെ ഇന്ത്യയുടെ ഒരിഞ്ചു ഭൂമി പോലും നഷ്ടപ്പെട്ടിട്ടില്ലെന്നും, തന്ത്രപരമായ നീക്കങ്ങളിലൂടെ സാഹചര്യം നിയന്ത്രിക്കാന് ഇന്ത്യയ്ക്ക് സാധിച്ചുവെന്നും അദ്ദേഹം വ്യക്തമാക്കി.
സര്ക്കാരും സായുധ സേനയും തമ്മില് കൃത്യമായ ഏകോപനം ഉണ്ടായിരുന്നുവെന്നും എല്ലാ തീരുമാനങ്ങളും സംയുക്തമായാണ് എടുത്തതെന്നും നരവണെ പറഞ്ഞു. പുസ്തകത്തിന്റെ പ്രസാധകര് ഇത് സംബന്ധിച്ച് സര്ക്കാരുമായി ചര്ച്ചയിലാണെന്നും അനുമതി ലഭിക്കുന്ന മുറയ്ക്ക് പുസ്തകം പുറത്തിറങ്ങുമെന്നും അദ്ദേഹം സൂചിപ്പിച്ചു.
Related News
