അബഹ: അസീര് പ്രവിശ്യയുടെ ആസ്ഥാനമായ അബഹയില് പ്രകൃതിയുടെ വിസ്മയ കാഴ്ചകള്. സമുദ്രനിരപ്പില് നിന്ന് ഏറെ ഉയരത്തിലുള്ള ഈ നഗരത്തിലെ മലനിരകളെ തൊട്ടുരുമ്മി താഴ്ന്നു പറക്കുന്ന മേഘങ്ങളും കനത്ത മഞ്ഞും അബഹയ്ക്ക് അപൂര്വ്വ സൗന്ദര്യമാണ് സമ്മാനിച്ചത്. പ്രകൃതി കനിഞ്ഞനുഗ്രഹിച്ച അസീര് മേഖലയുടെ വൈവിധ്യവും സൗന്ദര്യവും വിളിച്ചോതുന്നതായിരുന്നു ഇന്നലത്തെ കാലാവസ്ഥ.
വൈകുന്നേരമായതോടെ അബഹയിലെ പ്രശസ്തമായ ക്ലൗഡ് പാര്ക്ക്, അബു ഖയാല്, ജബല് നഹ്റാന് എന്നിവിടങ്ങളെല്ലാം മൂടല്മഞ്ഞില് മുങ്ങി. മലഞ്ചെരിവുകളില്നിന്ന് നഗരവീഥികളിലേക്ക് മഞ്ഞിന് പാളികള് പടര്ന്നുകയറിയപ്പോള് അത് അബഹയെ ഒരു കാവ്യസുന്ദരമായ ഭൂമിയാക്കി മാറ്റി. ഈ മനോഹര ദൃശ്യം ആസ്വദിക്കാനും ക്യാമറകളില് പകര്ത്താനുമായി നിരവധി സന്ദര്ശകരാണ് എത്തിയത്.
കനത്ത മൂടല്മഞ്ഞ് അനുഭവപ്പെട്ടതിനെത്തുടര്ന്ന് പലയിടങ്ങളിലും കാഴ്ചപരിധി കുറഞ്ഞെങ്കിലും, ആസ്വാദ്യകരമായ തണുപ്പും തെളിഞ്ഞ കാറ്റും ജനങ്ങള്ക്ക് നവോന്മേഷം പകര്ന്നു. വര്ഷം മുഴുവന് വിനോദസഞ്ചാരികളെ ആകര്ഷിക്കുന്ന അബഹയുടെ സവിശേഷമായ ഭൂപ്രകൃതിയും കാലാവസ്ഥയും ഒരിക്കല് കൂടി അടയാളപ്പെടുത്തുന്നതായിരുന്നു ഈ പ്രതിഭാസം.
