ജിസാൻ: മലപ്പുറം കിടങ്ങയം മഹല്ലിൽ കോരംതൊടിയിൽ താമസിക്കുന്ന കെ.പി. അഹമ്മദ്കുട്ടി എന്ന കുഞ്ഞാപ്പ (58) സൗദി അറേബ്യയിലെ ജിസാനിൽ ഹൃദയാഘാതം മൂലം നിര്യാതനായി. ഞായറാഴ്ച രാത്രി താമസസ്ഥലത്ത് വെച്ചായിരുന്നു അന്ത്യം.

ജിസാൻ മദായക്കടുത്ത് ഷവർമ്മ റിയാ ലൈൻ ഷോപ്പിലെ ജീവനക്കാരനായിരുന്നു. മഗ്രിബ് നമസ്‌കാരത്തിന് ശേഷം ശാരീരിക അസ്വസ്ഥതയും ക്ഷീണവും അനുഭവപ്പെട്ടതിനെ തുടർന്ന് റൂമിൽ വിശ്രമിക്കാൻ പോയതായിരുന്നു. തുടർന്ന് ഹൃദയാഘാതം സംഭവിക്കുകയായിരുന്നു. ശനിയാഴ്ച പനിയെത്തുടർന്ന് ചികിത്സ തേടിയിരുന്നെങ്കിലും മറ്റ് ആരോഗ്യപ്രശ്‌നങ്ങൾ ഉണ്ടായിരുന്നില്ല.

മൃതദേഹം ഇപ്പോൾ ജിസാൻ ജനറൽ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. വിവരമറിഞ്ഞ് ബന്ധുക്കളായ അബ്ദുൽ അസീസ്, ഇസ്മായിൽ എന്നിവർ ജിസാനിലെത്തിയിട്ടുണ്ട്. ജിസാൻ കെ.എം.സി.സി വെൽഫെയർ വിങ്ങിന്റെ മേൽനോട്ടത്തിൽ സെൻട്രൽ കമ്മിറ്റി പ്രസിഡന്റ് ശംസു പൂക്കോട്ടൂർ, മദായ കെ.എം.സി.സി സെക്രട്ടറി ഹാരിസ് മാട്ടറ എന്നിവരുടെ നേതൃത്വത്തിൽ നിയമനടപടികൾ പൂർത്തിയാക്കി മൃതദേഹം ജിസാനിൽ തന്നെ മറവുചെയ്യും.

ഭാര്യ: ഖദീജ. മക്കൾ: ദിൽഷാ ശിബ്ലി, നാജിയ. സഹോദരങ്ങൾ: കെ.പി. സുബൈർ ഫൈസി, സലാം.