തിരുവനന്തപുരം: കേരളത്തില്‍ ഭരണമാറ്റം പ്രവചിച്ച് ഭൂരിഭാഗം എക്സിറ്റ് പോള്‍ ഫലങ്ങളും. ഇഞ്ചോടിഞ്ച് പോരാട്ടം നടന്ന നിയമസഭാ തെരഞ്ഞെടുപ്പില്‍ യുഡിഎഫ് അധികാരം പിടിക്കുമെന്നാണ് പ്രമുഖ ഏജന്‍സികളെല്ലാം ഒരുപോലെ വ്യക്തമാക്കുന്നത്. 140 സീറ്റുകളുള്ള കേരള നിയമസഭയില്‍ കേവല ഭൂരിപക്ഷത്തിന് വേണ്ട 71 എന്ന മാന്ത്രിക സംഖ്യ യുഡിഎഫ് മറികടക്കുമെന്നാണ് സര്‍വേകള്‍ സൂചിപ്പിക്കുന്നത്.

ടൈംസ് നൗ സര്‍വേ പ്രകാരം കേരളത്തില്‍ യുഡിഎഫിന് 78-85 സീറ്റുകളാണ് പ്രവചിക്കുന്നത്. എല്‍ഡിഎഫിന് 56-66 സീറ്റുകളും എന്‍ഡിഎക്ക് 2-3 സീറ്റുകളുമാണ് പ്രവചിക്കുന്നത്. ആക്സിസ് മൈ ഇന്ത്യ യുഡിഎഫ് 78- 90 എല്‍ഡിഎഫ് 49-62 എന്‍ഡിഎ 0-3, പീപ്പിള്‍സ് പള്‍സ് യുഡിഎഫ് 75-85, എല്‍ഡിഎഫ് 55-65, എന്‍ഡിഎ 0-3 സി.എന്‍.എന്‍ - ന്യൂസ് 18 യുഡിഎഫ് 70-80, എല്‍ഡിഎഫ് 58-68, എന്‍ഡിഎ 0-4, മാട്രിസ് യുഡിഎഫ് 70-75, എല്‍ഡിഎഫ് 60-65, എന്‍ഡിഎ 3-5. എന്‍ഡിഎയ്ക്ക് കാര്യമായ ചലനമുണ്ടാക്കാന്‍ സാധിക്കില്ലെന്നും പരമാവധി 5 സീറ്റുകള്‍ വരെ മാത്രമേ ലഭിക്കാനിടയുള്ളൂ എന്നുമാണ് റിപ്പോര്‍ട്ടുകള്‍.

അസമില്‍ ബിജെപി നയിക്കുന്ന എന്‍ഡിഎ സഖ്യം അധികാരം നിലനിര്‍ത്തുമെന്ന് ആക്സിസ് മൈ ഇന്ത്യയും മാട്രിസും പ്രവചിക്കുന്നു. എന്‍ഡിഎയ്ക്ക് 85 മുതല്‍ 100 സീറ്റുകള്‍ വരെ ലഭിച്ചേക്കാം. തമിഴ്നാട്: ഡിഎംകെ സഖ്യം ഭരണം നിലനിര്‍ത്തുമെന്ന് പീപ്പിള്‍സ് പള്‍സ് സര്‍വേ പറയുന്നു (125-145 സീറ്റുകള്‍). നടന്‍ വിജയിയുടെ പാര്‍ട്ടിയായ ടിവികെ 18 മുതല്‍ 24 സീറ്റുകള്‍ വരെ നേടി കന്നി പോരാട്ടത്തില്‍ സാന്നിധ്യമറിയിക്കും.

പശ്ചിമ ബംഗാള്‍: ബംഗാളില്‍ ബിജെപി വലിയ മുന്നേറ്റം നടത്തുമെന്നാണ് പി-മാര്‍ക്ക് സര്‍വേ സൂചിപ്പിക്കുന്നത്. ബിജെപി 150-175 സീറ്റുകള്‍ നേടുമെന്നും തൃണമൂല്‍ കോണ്‍ഗ്രസ് 118-138 സീറ്റുകളിലേക്ക് ഒതുങ്ങുമെന്നും പ്രവചിക്കപ്പെടുന്നു.

എക്സിറ്റ് പോള്‍ ഫലങ്ങള്‍ കേവലം പ്രവചനങ്ങള്‍ മാത്രമാണ്. അന്തിമ ഫലം വരുമ്പോള്‍ ഇതില്‍ മാറ്റങ്ങള്‍ സംഭവിക്കാം. എങ്കിലും കേരളത്തില്‍ യുഡിഎഫ് ക്യാമ്പുകളില്‍ വലിയ ആവേശം പകരുന്നതാണ് പുറത്തുവന്ന റിപ്പോര്‍ട്ടുകള്‍.