ജിദ്ദ- സൗദി അറേബ്യയിലെ മുഴുവന് വിമാനത്താവളങ്ങളും നാഷണല് സെന്റര് ഫോര് എന്വയോണ്മെന്റല് കംപ്ലയന്സിന്റെ പരിസ്ഥിതി പ്രവര്ത്തന അനുമതി കരസ്ഥമാക്കി. പരിസ്ഥിതി സംരക്ഷണവുമായി ബന്ധപ്പെട്ട എല്ലാ മാനദണ്ഡങ്ങളും വ്യവസ്ഥകളും പാലിച്ചതിനെത്തുടര്ന്നാണ് ജനറല് അതോറിറ്റി ഓഫ് സിവില് ഏവിയേഷന് ഈ സുപ്രധാന നേട്ടം കൈവരിച്ചത്. രാജ്യത്തെ സിവില് ഏവിയേഷന് മേഖല പരിസ്ഥിതി സുസ്ഥിരതക്ക് നല്കുന്ന മുന്ഗണനയുടെ തെളിവായി ഇത് വിലയിരുത്തപ്പെടുന്നു.
2026-ലെ സൗദി പരിസ്ഥിതി വാരത്തോടനുബന്ധിച്ചാണ് ഈ പ്രഖ്യാപനം പുറത്തുവന്നത്. വിമാനത്താവളങ്ങളുടെ പ്രവര്ത്തനക്ഷമത വര്ദ്ധിപ്പിക്കുന്നതിനൊപ്പം പ്രകൃതിക്കും പരിസ്ഥിതിക്കും ഉണ്ടാകുന്ന ആഘാതങ്ങള് കുറയ്ക്കുന്നതിനും ഈ അംഗീകാരം സഹായിക്കും. വിഷന് 2030-ന്റെ ലക്ഷ്യങ്ങള്ക്കനുസൃതമായി മികച്ച സുസ്ഥിര രീതികള് നടപ്പിലാക്കിയതിലൂടെ വിമാനത്താവളങ്ങളിലെ പരിസ്ഥിതി ഗുണനിലവാരം ഉയര്ത്താന് സാധിച്ചതായി അതോറിറ്റി വ്യക്തമാക്കി.
ഭാവി തലമുറകള്ക്കായി സുസ്ഥിരമായ ഇന്ഫ്രാസ്ട്രക്ചര് കെട്ടിപ്പടുക്കുന്നതിന്റെ ഭാഗമായാണ് നാഷണല് സെന്റര് ഫോര് എന്വയോണ്മെന്റല് കംപ്ലയന്സുമായി ചേര്ന്ന് അതോറിറ്റി ഈ പദ്ധതി പൂര്ത്തിയാക്കിയത്. പരിസ്ഥിതി സംരക്ഷണത്തെക്കുറിച്ച് സമൂഹത്തില് അവബോധം വളര്ത്തുന്നതിനും പ്രകൃതി വിഭവങ്ങള് സംരക്ഷിക്കുന്നതിനും പരിസ്ഥിതി വാരം ലക്ഷ്യമിടുന്നു. നൂതന സാങ്കേതിക വിദ്യകളിലൂടെയും സുസ്ഥിര വികസന മാതൃകകളിലൂടെയും ആഗോള നിലവാരത്തിലുള്ള പരിസ്ഥിതി സൗഹൃദ വ്യോമയാന മേഖലയായി സൗദി അറേബ്യയെ മാറ്റുകയാണ് ലക്ഷ്യം.
Related News
