കണ്ണൂര്‍: ബി.ജെ.പി പ്രവര്‍ത്തകനും ഓട്ടോ ഡ്രൈവറുമായ ഗൃഹനാഥന്‍ സുഹൃത്തിന്റെ വെടിയേറ്റ് മരിച്ചു. കടന്നപ്പള്ളി-പാണപ്പുഴ ഗ്രാമപഞ്ചായത്തിലെ കൈതപ്രത്ത് കെ.കെ. രാധാകൃഷ്ണന്‍ (51) ആണ് മരിച്ചത്. കൊലപാതകവുമായി ബന്ധപ്പെട്ട് പെരുമ്പടവ് സ്വദേശിയായ സന്തോഷിനെ പരിയാരം പോലീസ് പിടികൂടി. ഇയാള്‍ മദ്യലഹരിയിലായിരുന്നു. സംഭവത്തില്‍ രാഷ്ട്രീയമില്ലെന്ന് പോലീസ് പറഞ്ഞു. വ്യക്തിവിരോധമാണ് കൊലപാതകത്തിന് പിന്നിലെന്നാണ് പ്രാഥമിക നിഗമനം.

കൈതപ്രം വായനശാലക്കു സമീപം രാധാകൃഷ്ണന്‍ പുതുതായി നിര്‍മിക്കുന്ന വീടിനു സമീപം ഇന്നു രാത്രി ഏഴരയോടെയായിരുന്നു സംഭവം. കരാറുകാരനായ സന്തോഷ് രാധാകൃഷ്ണനെ നിര്‍മാണത്തിലിരിക്കുന്ന വീട്ടിലേക്കു വിളിച്ചു വരുത്തി വെടിവെക്കുകയായിരുന്നുവെന്ന് പറയുന്നു. വെടിയൊച്ച കേട്ട് ഓടിയെത്തിയ നാട്ടുകാര്‍ കണ്ടത് രക്തത്തില്‍ കുളിച്ചു കിടക്കുന്ന രാധാകൃഷ്ണനെയാണ്. ഉടന്‍ കണ്ണൂര്‍ മെഡിക്കല്‍ കോളേജ് ആശുപത്രിയിലെത്തിച്ചുവെങ്കിലും രക്ഷിക്കാനായില്ല.

വടക്കേടത്ത് മിനിയാണ് രാധാകൃഷ്ണന്റെ ഭാര്യ. വിദ്യാര്‍ഥികളായ അമര്‍നാഥ്, അര്‍പ്പിത് മക്കളാണ്.

ഫോട്ടോ: കൊല്ലപ്പെട്ട രാധാകൃഷ്ണനും പോലീസ് പിടിയിലായ സന്തോഷും.