കൊച്ചി: കാന്സര് സര്ജറിയില് 1700ലേറെ വന്കുടല് ശസ്ത്രക്രിയകള് പൂര്ത്തിയാക്കി എറണാകുളം ജനറല് ആശുപത്രി. ഇതില് 1300ഉം ലാപ്രോസ്കോപ്പിക് കീഹോള് സര്ജറിയാണ്. കീഹോള് ആരംഭിച്ചതിന് ശേഷം ഇത് വരെയായി ഇവിടെ 5000ല്പ്പരം ലാപ്രോസ്കോപ്പിക് ശസ്ത്രക്രിയകള് നടത്തി എറണാകുളം ജനറല് ആശുപത്രി റെക്കോഡിട്ടതായി ആശുപത്രി സൂപ്രണ്ട് ഡോ. ആര്. ഷാഹിര്ഷായും കീഹോള് സര്ജന് ഡോ. സജിമാത്യൂവും പ്രതികരിച്ചു. ഇവിടെ പ്രതിമാസം ബൈപാസ് ഉള്പ്പെടെ 400 മുതല് 600 വരെ ശസ്ത്രക്രിയകളാണ് നടക്കുന്നത്. 2023 സപ്തംബര് 26ന് 28 വരെ കീഹോള് സര്ജറി ഒരേദിനം നടന്നിട്ടുണ്ട്.
ഉദരം, വന്കുടല്, ഹെര്ണിയ, പാന്ക്രിയാസ്, അന്നനാളം തുടങ്ങിയ ഭാഗങ്ങളിലെ ശസ്ത്രക്രിയകളാണ് കാന്സര് ചികിത്സയില് കൂടുതലായി നടന്നത്. ഇതില് അന്നനാളം, ഉദരം എന്നിവിടങ്ങളില് മാത്രം 600 കീഹോള് സര്ജറി നടന്നു, ബാക്കി ഓപ്പണ് സര്ജറിയായിരുന്നു. പ്രതിദിനം 2750 മുതല് 3000 രോഗികള്വരെ ചികിത്സ തേടിയെത്തുന്ന ഇവിടെ 125 ഡോക്ടര്മാരുടെ സേവനം ലഭ്യമാണ്.
ആയിരത്തോളം കിടക്കകളുള്ള സര്ക്കാര് മേഖലയിലെ സംസ്ഥാനത്തെ മികച്ച ആശുപത്രിയാണ് എറണാകുളം ജനറല് ആശുപത്രി. എം.പിയായിരിക്കേ, മന്ത്രി പി. രാജീവിന്റെ ശ്രമഫലമായി ഇവിടെ എം.ആര്.ഐ സ്കാന് സൗകര്യം ലഭ്യമാക്കിയിട്ടുണ്ട്. റേഡിയേഷന് തെറാപ്പിക്ക് ലിനാക്, 24 മണിക്കൂറും പ്രവര്ത്തിക്കുന്ന നൂതന സാങ്കേതിക വിദ്യയോടെയുള്ള സെന്ട്രല് ലാബ്, ആന്ജിയോഗ്രാഫിക്കും ആന്ജിയോപ്ലാസ്റ്റിക്കും വേണ്ടിയുള്ള കാര്ഡിയാസ് കാത്ത്ലാബ്, കളര്ഡോപ്ലര്, എക്കോ കാര്ഡിയോഗ്രാഫി തുടങ്ങിയ അത്യാധുനിക ചികിത്സാ സൗകര്യങ്ങളും ഇവിടെയുണ്ട്.
സേവന മനസ്ഥിതിയോടെ പ്രവര്ത്തിക്കുന്ന 17 സര്ജന്മാരുടെയും സ്റ്റാഫിന്റെയും ആത്മാര്ഥതയാണ് പാവപ്പെട്ടവര്ക്ക് മികച്ച ചികിത്സ ലഭ്യമാക്കാന് അവസരമുണ്ടാക്കിയതെന്ന് സൂപ്രണ്ട് പറഞ്ഞു. ആശുപത്രിയുടെ അടിസ്ഥാന വികസനത്തിനും ദൈനംദിന പ്രവര്ത്തികള്ക്കുമായി സര്ക്കാര് മികച്ച പിന്തുണയാണ് നല്കിവരുന്നത്. കൊച്ചി മേയര് എം. അനില്കുമാര്, ഹൈബി ഈഡന് എം.പി, ടി. ജെ. വിനോദ് എംഎല്എ എന്നിവര് നല്കി വരുന്ന സേവനവും വിലമതിക്കാന് കഴിയാത്തതാണ്.
1845ല് അന്നത്തെ കൊച്ചി മഹാരാജാവ് തുടങ്ങിവെച്ചതാണ് ഈ ആശുപത്രി. അടുത്തിടെ സൂപ്പര് സ്പെഷ്യാലിറ്റി പദവിയും സംസ്ഥാനത്തെ ആദ്യത്തെ എന്എബിഎച്ച് അംഗീകാരവും നേടിയ ജനറല് ആശുപത്രികൂടിയാണിത്. കേന്ദ്രസര്ക്കാറിന്റെ എന്.ക്യൂ.എ.എസ് സര്ട്ടിഫിക്കറ്റും അടുത്തിടെ നേടിയിട്ടുണ്ട്.
Related News
