തിരുവനന്തപുരം: മുന് കേന്ദ്രമന്ത്രി രാജീവ് ചന്ദ്രശേഖര് ബിജെപി സംസ്ഥാന അധ്യക്ഷനാകും. കോര്കമ്മിറ്റി യോഗത്തില് കെ. സുരേന്ദ്രന്റെ ഒഴിവിലേക്ക് രാജീവ് ചന്ദ്രശേഖറിന്റെ പേര് ദേശീയ നേതൃത്വമാണ് നിര്ദേശിച്ചതെന്നാണ് സൂചന.
രാജീവ് ചന്ദ്രശേഖറിനു പുറമെ, ജനറല്സെക്രട്ടറി എം.ടി. രമേശ്, മുന്പ്രസിഡന്റ് വി. മുരളീധരന്, ശോഭാ സുരേന്ദ്രന് എന്നിവരായിരുന്നു പട്ടികയിലുണ്ടായിരുന്ന മറ്റ് നേതാക്കള്. ഇവരെയെല്ലാം മറികടന്നാണ് കേരളത്തിലെ പാര്ട്ടിയെ നയിക്കാന് രാജീവ് ചന്ദ്രശേഖര് എത്തുന്നത്. കോര് കമ്മിറ്റിയോഗം തുടങ്ങിയ ഉടന് ദേശീയ നേതൃത്വം പേര് നിര്ദേശിക്കുകയായിരുന്നുവെന്നാണ് പുറത്തു വരുന്ന വിവരം. കേരളത്തില് പുതിയൊരു മുഖം നേതൃസ്ഥാനത്തേക്ക് വരട്ടെയെന്ന ദേശീയ നേതൃത്വത്തിന്റെ നിലപാടാണ് രാജീവ് ചന്ദ്രശേഖറിന് അനുകൂലമായത്. ഇനി നടക്കുന്നതെല്ലാം നടപടിക്രമങ്ങള് മാത്രമായിരിക്കും.
രണ്ടുപതിറ്റാണ്ടിന്റെ രാഷ്ട്രീയ അനുഭവ സമ്പത്തുമായാണ് രാജീവ് ചന്ദ്രശേഖര് ബിജെപിയുടെ സംസ്ഥാന അധ്യക്ഷനാകുന്നത്. രണ്ടാം മോദി സര്ക്കാരില് ഐടി ആന്റ് ഇലക്ട്രോണിക്സിന്റെയും നൈപുണ്യവികസനത്തിന്റെയും ചുമതലയുള്ള കേന്ദ്ര സഹമന്ത്രിയായിരുന്നു. കര്ണാടകയില്നിന്ന് മൂന്ന് തവണ രാജ്യസഭാംഗമായി തെരഞ്ഞെടുക്കപ്പെട്ടിട്ടുണ്ട്.
ഞായറാഴ്ച ഉച്ചയ്ക്ക് രണ്ടിന് രാജീവ് ചന്ദ്രശേഖര് നാമനിര്ദേശ പത്രിക സമര്പ്പിക്കും. പ്രകാശ് ജാവേക്കറാണ് അദ്ദേഹത്തിന്റെ പേര് കോര്കമ്മിറ്റി യോഗത്തെ അറിയിച്ചത്. മത്സരം ഒഴിവാക്കാന് കോര്കമ്മിറ്റിയിലെ ധാരണയ്ക്കുശേഷം ഒരാളില്നിന്നുമാത്രമേ പത്രിക സ്വീകരിക്കാന് സാധ്യതയുള്ളൂ. ഞായറാഴ്ച ഉച്ചയ്ക്ക് രണ്ട് മുതല് മൂന്നുവരെയാണ് പത്രിക സമര്പ്പിക്കാനുള്ള സമയം. നാലിനാണ് സൂക്ഷ്മ പരിശോധന. ഒരാളേ പത്രിക നല്കുന്നുള്ളൂവെങ്കില് ഇന്നു തന്നെ പ്രസിഡന്റ് ആരെന്നറിയാനാവും. തിങ്കളാഴ്ചയായിരിക്കും ഔദ്യോഗിക പ്രഖ്യാപനം.
Related News
