ജിദ്ദ: ജിദ്ദ ആലുവ കൂട്ടായ്മ (ജാക്) ഒരുക്കിയ ഇഫ്താര് വിരുന്ന് അംഗങ്ങളുടെയും സാമൂഹ്യ, സാംസ്കാരിക രംഗത്തെ പ്രമുഖരുടെയും സാന്നിധ്യംകൊണ്ട് ശ്രദ്ധേയമായി. സാമൂഹ്യപ്രവര്ത്തനങ്ങളില് ഒരു വ്യാഴവട്ടക്കാലത്തെ പ്രവര്ത്തന പാരമ്പര്യമുള്ള ജാക് എല്ലാ വര്ഷവും നടത്തിവരുന്ന ഇഫ്താര് വിരുന്ന് ഇക്കുറിയും അംഗങ്ങള്ക്കും കുടുംബാംഗങ്ങള്ക്കും പുറമെ ജിദ്ദയിലെ സാമുഹ്യ, സാംസ്കാരിക, പ്രാദേശിക, കൂട്ടായ്മകളിലെ നേതൃത്വങ്ങളെയും ഉള്പ്പെടുത്തിയാണ് നടത്തിയത്. സീസണ്സ് റസ്റ്റോറന്റില് നടത്തിയ വിരുന്നിന് കൂട്ടായ്മ പ്രസിഡണ്ട് അബ്ദുല് കാദര് ആലുവ, ജനറല് സെക്രട്ടറി അന്ഫല് ബഷീര്, രക്ഷാധികാരികളായ സുബൈര് മുട്ടം, ഡോ. സിയാവുദ്ദീന് എന്നിവര് നേതൃത്വം നല്കി.
വ്രതശുദ്ധിയോടൊപ്പം മാനവമൂല്യങ്ങള് ഉയര്ത്തിപിടിച്ച് സാമൂദായിക സൗഹാര്ദം നിലനിര്ത്തുന്നതില് ഇഫ്താര് സംഗമങ്ങള് വഹിക്കുന്ന പങ്ക് നിസ്തുലമാണെന്ന് ഷഫീഖ് നദ്വി ഇഫ്താര് സന്ദേശത്തില് പറഞ്ഞു. അബ്ദുല് കാദര് ആലുവ അധ്യക്ഷത വഹിച്ചു. ജനറല് സെക്രട്ടറി അന്ഫല് ബഷീര് സ്വാഗതവും വൈസ് പ്രസിഡന്റ് ഫൈസല് അലിയാര് നന്ദിയും പറഞ്ഞു. രക്ഷാധികാരി സുബൈര് മുട്ടത്തിന്റെ നേതൃത്വത്തില് ട്രഷറര് കലാം എടയാര്, കോഡിനേറ്റര്മാരായ അന്വര് തോട്ടുമുഖം, നൗഷാദ് അടുവാശ്ശേരി എന്നിവര് പരിപാടി നിയന്ത്രിച്ചു. ജാക് എക്സിക്യൂട്ടീവ് അംഗങ്ങള് അതിഥികളെ സ്വീകരിച്ചു.
