മക്ക: റമദാനിലെ അവസാന ദിവങ്ങളിലെ ഉംറ തീര്ഥാടകരുടെ വന് തിരക്കു കണക്കിലെടുത്തും ഹജ്ജ് സീസണിന് മുന്നോടിയായും തീര്ഥാടകര്ക്ക് മികച്ച ആരോഗ്യ സേവനങ്ങള് നല്കുന്നതിന്റെ ഭാഗമായി സൗദി റെഡ് ക്രസന്റ് അതോറിറ്റി മക്കയിലെ ഗ്രാന്ഡ് മോസ്കിന്റെ പരിസരത്ത് രണ്ട് ഹെലിപാഡുകള് തുറന്നു. ഏതു തിരക്കിനിടയിലും രോഗികളെ എളുപ്പം ആശുപത്രികളില് എത്തിക്കാനാവും വിധം ഒന്ന് ഹറമിനു സമീപത്തെ കെട്ടിടത്തിനു മുകളിലായും മറ്റൊന്ന് സമീപ പ്രദേശത്തുമായാണ് തുറന്നത്. ഇവിടെ നടത്തിയ പരീക്ഷണ പറക്കല് വിജയകരമായിരുന്നു.
മക്കയിലെയും ജിദ്ദയിലെയും ആശുപത്രികളിലേക്ക് ഗുരുതരമായ കേസുകള് വേഗത്തില് എത്തിക്കാന് ഹെലിപാഡുകള് സഹായിക്കും. കൂടാതെ, ഹറം എമര്ജന്സി ആശുപത്രിയില് തീവ്രപരിചരണ വിഭാഗങ്ങള്, മെഡിക്കല് ലബോറട്ടറികള്, റേഡിയോളജി സേവനങ്ങള്, ഇന്-ഹൗസ് ഫാര്മസി, പകര്ച്ചവ്യാധികള്ക്കുള്ള ഐസൊലേഷന് യൂണിറ്റുകള് എന്നിവയും സജ്ജീകരിച്ചിരിച്ചിട്ടുണ്ട്.
