തിരുവനന്തപുരം- ശബരിമല ദര്ശനത്തിനിടെ മമ്മൂട്ടിയുടെ പേരില് മോഹന്ലാല് നടത്തിയ വഴിപാടിന്റെ വിശദവിവരങ്ങള് ചോര്ത്തിയത് ജീവനക്കാരല്ലെന്ന് തിരുവിതാംകൂര് ദേവസ്വം ബോര്ഡ്. വഴിപാട് വിവരങ്ങള് പുറത്തു വിട്ടത് ദേവസ്വം ഉദ്യോഗസ്ഥര് ആണെന്ന് മോഹന്ലാല് നടത്തിയ പരാമര്ശം പിന്വലിക്കണമെന്നു ദേവസ്വം ബോര്ഡ് ആവശ്യപ്പെട്ടു.
മോഹന്ലാല് തെറ്റിദ്ധരിച്ചിരിക്കുകയാണ്. വഴിപാടിന് പണമയക്കുമ്പോള് കൗണ്ടര് ഫോയിലിന്റെ ഒരു ഭാഗം മാത്രമാണ് ദേവസ്വം സൂക്ഷിക്കുക. മറുഭാഗം വഴിപാട് നടത്തുന്നയാള്ക്ക് കൈമാറും. ഇതേ രീതിയില് മോഹന്ലാലിന് വേണ്ടി വഴിപാട് നടത്തിയപ്പോഴും രശീത് കൈമാറിയിട്ടുണ്ട്. രശീത് ഉദ്യോഗസ്ഥര് ആരോ മാധ്യമങ്ങള്ക്ക് ചോര്ത്തി നല്കിയതാണെന്നും പ്രാര്ഥന തികച്ചും സ്വകാര്യമായ കാര്യമാണെന്നും കഴിഞ്ഞ ദിവസം മോഹന്ലാല് പറഞ്ഞിരുന്നു.
ഇക്കാര്യത്തില് ഉദ്യോഗസ്ഥരുടെ ഭാഗത്ത് വീഴ്ചയുണ്ടായിട്ടില്ലെന്നും മോഹന്ലാല് പ്രസ്താവന തിരുത്തുമെന്നാണ് കരുതുന്നതെന്നും ബോര്ഡ് വ്യക്തമാക്കി. മമ്മൂട്ടിയുടെ പേരില് നടത്തിയ വഴിപാടിന്റെ രശീതാണ് സമൂഹമാധ്യമങ്ങളിലൂടെ പ്രചരിച്ചിരുന്നത്. മമ്മൂട്ടിയുടെ ആരോഗ്യവുമായി ബന്ധപ്പെട്ട് അഭ്യൂഹങ്ങള് ഉണ്ടായ സാഹചര്യത്തിലാണ് രശീത് പുറത്തു വന്നത്.
Related News
