കൊച്ചി: വിവാഹ വാഗ്ദാനം നല്‍കി യുവതിയില്‍നിന്നു 19 ലക്ഷം തട്ടിയെടുത്ത കേസില്‍ പ്രവാസിയുടെ ഭാര്യ അറസ്റ്റില്‍. തൃശൂര്‍ എടക്കുളം പാളയംകോട് സ്വദേശി നിതയാണ് (24) അറസ്റ്റിലായത്. പ്രവാസി കേസിലെ ഒന്നാം പ്രതിയാണ്. അദ്ദേഹം ഇപ്പോള്‍ വിദേശത്താണ്.

കളമശേരി പോലീസാണു നിതയെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. ഓണ്‍ലൈന്‍ മാട്രിമോണി സൈറ്റില്‍ വ്യാജ ഐഡി ഉണ്ടാക്കിയായിരുന്നു തട്ടിപ്പ്. ആലപ്പുഴ സ്വദേശിനിയാണു തട്ടിപ്പിനിരയായത്. നിതയും ഇപ്പോള്‍ വിദേശത്തള്ള ഭര്‍ത്താവും ചേര്‍ന്നാണ് വ്യാജ ഐഡിയുണ്ടാക്കി തട്ടിപ്പു നടത്തിയത്. പോലീസ് വിശദമായ അന്വേഷണം നടത്തി വരുന്നു.