മക്ക: പരിശുദ്ധ നഗരമായ മക്ക ഈദുല് ഫിത്ര് ആഘോഷത്തിനുള്ള തയാറെടുപ്പിലാണ്. ആത്മീയതയുടെ നിറവില് ഹറമും പരിസരവും നിറഞ്ഞു നില്ക്കുമ്പോള് മക്കയുടെ തെരുവുകള് പെരുന്നാള് ആഘോഷത്തിനായുള്ള ഒരുക്കങ്ങളുടെ തിരക്കിലാണ്. വര്ണങ്ങള് വാരി വിതറിയുള്ള തെരുവുകള്ക്ക് ചന്തം പകര്ന്ന് കടകമ്പോളങ്ങളും വര്ണ വൈവിധ്യങ്ങളാല് നിറഞ്ഞു നില്ക്കുന്നു. എങ്ങും ഉത്സവ പ്രതീതിയാണ്. നിറങ്ങളുടെയും, മനോഹരമായ സുഗന്ധങ്ങളുടെയും, തക്ബീറിന്റെയും തഹ്ലീലിന്റെയും ഹൃദയസ്പര്ശിയായ മന്ത്രങ്ങളുടെയും സമന്വയമായി പുണ്യ നഗരി മാറിയിരിക്കുന്നു.
ലോകത്തിന്റെ പരിഛേദമാണ് ഇപ്പോള് മക്ക. ഇരുനൂറോളം വരുന്ന രാജ്യങ്ങളില്നിന്നുള്ള തീര്ഥാടക ലക്ഷങ്ങളാല് വീര്പ്പുമുട്ടുകയാണ് പുണ്യ നഗരി. ആധുനികവല്ക്കരണത്തോടൊപ്പം മക്കയുടെ പാരമ്പര്യവും സംസ്കാരവും അതേപടി കാത്തു സൂക്ഷിക്കുന്നതിലും മക്കക്കാര് ഒരുപടി മുന്നിലാണ്. രാത്രിയെ പകലാക്കിയാണ് സന്ദര്ശകരും മക്കക്കാരും പെരുന്നാളിനാവശ്യമായ സാധനങ്ങള് വാങ്ങിക്കൂട്ടുന്നത്.
വിവിധ രാജ്യങ്ങളില് നിന്നുള്ള സന്ദര്ശകരെ ആകര്ഷിക്കുംവിധത്തിലാണ് കടകമ്പോളങ്ങള് അണിഞ്ഞൊരുങ്ങിയിട്ടുള്ളത്. വ്യാപാര രംഗത്തും പാരമ്പര്യം കാത്തു സൂക്ഷിക്കാനാണ് അധിക മക്കനിവാസികളും ഇഷ്ടപ്പെടുന്നത്. സന്ദര്ശകര്ക്ക് ആവശ്യമുള്ളതും അതാണ്. വസ്ത്രങ്ങള്, മധുരപലഹാരങ്ങള്, വ്യത്യസ്ത രുചിക്കൂട്ടുകളുടെ ഭക്ഷണ വിഭവങ്ങള്, സന്ദര്ശകര്ക്ക് എന്നും ഓര്മയില് സൂക്ഷിക്കാന് കഴിയുന്ന അലങ്കാര വസ്തുക്കള് തുടങ്ങി എല്ലാത്തരം സാധനങ്ങളാല് കടകളുടെ അകവും പുറവും നിറഞ്ഞിരിക്കുകയാണ്.
പെരുന്നാള് അടുത്തതോടെ ഇപ്പോള് ഏറ്റവും കൂടുതല് ആവശ്യക്കാരുള്ളത് മധുരപലഹാരങ്ങള്ക്കാണ്. പെരുന്നാളിന് മധുരപലഹാരങ്ങള് വാങ്ങിക്കൂട്ടുന്നതില് സ്വദേശികള് മത്സരിക്കാറാണ് പതിവ്. അവരോടൊപ്പം സന്ദര്ശകരായ തീര്ഥാടകര് കൂടിയാവുമ്പോള് മധുരപലഹാര വിപണിയില് വന് തിരക്കാണ് അനുഭവപ്പെടുന്നത്. പെരുന്നാള് ദിനം പള്ളികളിലും ബന്ധുഗൃഹ സന്ദര്ശന വേളയിലും സൗഹൃദം പുതുക്കുന്നതിനുള്ള ഒത്തുകൂടലുകളിലും മധുരം വിളമ്പല് അറബ് സാംസ്കാരിക പാരമ്പര്യമാണ്. അതു കാത്തു സൂക്ഷിക്കുന്നതില് ഇന്നും പിശുക്കു കാണിക്കാറില്ലെന്നതാണ് ഈ വിപണിയെ കൂടുതല് സജീവമാക്കുന്നത്. പെരുന്നാളിനു തൊട്ടു മുന്പുള്ള ദിവസങ്ങളില് തെരുവുകളിലെല്ലാം മിഠായികള് മാത്രം വില്ക്കുന്ന കടകള് തുറക്കുന്നതും അവിടങ്ങളില് വന് തിരക്ക് അനുഭവപ്പെടുന്നതും ഇക്കാരണത്താലാണ്.
